ពិធីករ ជា វណ្ណារិទ្ធិ បានបង្ហោះសារ នៅលើហ្វេសប៊ុក និយាយរៀបរាប់ពីក្មេងស្រីពីរនាក់ ដែលក្មេងស្រីទាំងនោះ បានស្រស់ទឹកភ្នែក លើវេទិកាមួយ ។ ខាងក្រោមនេះជាខ្លឹមសារទាំងស្រុងរបស់ ជា វណ្ណារិទ្ធិ÷
"រឿងមួយដែលយើងនឹកស្មានមិនដល់ ថាហេតុអ្វីបានជាក្មួយស្រី កល្យាណ និង កុមារីម្នាក់ទៀតយំកំឡុងពេលបង្ហាញចំណាប់អារម្មណ៍ផ្ទាល់ខ្លួន ក្នុងពិធីសម្ភោធក្លឹបនៃក្តីស្រលាញ់ ? ខ្ញុំបាទសូមជម្រាបជូនខ្លះៗអំពីក្មួយស្រីកល្យាណ ។
កល្យាណជាកុមារីកំព្រាឪពុក អាយុ12ឆ្នាំ ដែលមានជំងឺ " តាឡាស់សេមី " តាំពីអាយុ16ខែ បានរៀបរាប់ទាំងទឹកភ្នែកថា ឈាមរបស់អ្នកស្មគ្រចិត្តបានជួយឲ្យក្មួយស្រីមានជីវិតរស់នៅជាមួយម៉ាក់រហូតដល់សព្វថ្ងៃនេះ។ ជារៀងរាល់ 20 ទៅ 30 ថ្ងៃក្មួយស្រីត្រូវចាក់បញ្ចូលឈាមម្តងនៅមន្ទីរពេទ្យ។ ក្មួយស្រី មានបំណងប្រាថ្នាចង់ រស់នៅជាមួយម្ដាយអោយបានយូរ និងចង់ក្លាយទៅជាអ្នករចនាម៉ូដនៅពេលអនាគតដើម្បីសងគុណម៉ាក់ ចង់ឲ្យម៉ាក់ញញឹម ចង់មើលថែម៉ាក់រហូតដល់ចាស់។
ការបញ្ចូលឈាមរបស់ក្មួយស្រីមិនមែន ១ឆ្នាំ ឬ ២ឆ្នាំជានោះទេ គឺក្មួយស្រីត្រូវការឈាមបញ្ចូលពេញមួយជីវិត 😭។
សូមពូមីង បងៗទាំងអស់គ្នាមេត្តាទៅបរិច្ចាគឈាមឲ្យបានទៀងទាត់ ដើម្បីជួយសង្គ្រោះអ្នកជំងឺដូចរូបប្អូន និងអ្នកជំងឺជាច្រើនទៀតដែលត្រូវការចាក់បញ្ចូលឈាម បើសិនជាគ្មានអ្នកបរិច្ចាគឈាម ពួកយើងនឹងស្លាប់៕
#TheLoveClub"
