ខេត្តបាត់ដំបង៖ កាលពីវេលាម៉ោងជាង០៣រសៀលថ្ងៃទី២២ ធ្នូ២០១៦ម្សិលមិញ ដោយសមត្ថកិច្ចបានធ្វើការឃាត់ខ្លួន បុរសម្នាក់ ខណៈបុរសរូបនេះបានវាយប្រពន្ធជាច្រើនលើកច្រើនសារ និងប្រទូស្តកេរកូនស្រីរបស់ខ្លួនដល់ទៅ០២នាក់ទៀតផង។ យោងតាមសមត្ដកិច្ចឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ ព្រឿង វ៉ាន់ អាយុ៣៧ឆ្នាំ ប្រពន្ធឈ្មោះ ជួយ សុខជា អាយុ៣៥ឆ្នាំ មានកូន៥នាក់ រស់នៅភូមិស្វាយជ្រុំ ឃុំអូរដំបង២ ស្រុកសង្កែ ខេត្តបាត់ដំបង ។
តាមពាក្យបណ្ដឹងរបស់ស្ត្រីជាប្រពន្ធឲ្យដឹងថា នៅពេលដែលបុរសជាប្តីផឹកស្រាស្រវឹងម្តងៗគាត់តែងតែវាយធ្វើបាបប្រពន្ធកូនសឹងតែរាល់ថ្ងៃ។ ដោយទ្រាំនឹងការវាយធ្វើបាបមិនបានទើបកាលពីខែឧសភាគាត់សុខចិត្តចុះចេញពីផ្ទះម្នាក់ឯងទៅធ្វើកម្មករស៊ីឈ្នួលគេនៅតាមបន្ទាត់ព្រំដែន។ លុះពេលថ្មីៗនេះគាត់ទទួលដំណឹងថា កូនស្រីរបស់គាត់២នាក់ក៏បានចុះចេញពីផ្ទះដែរ ទើបគាត់ត្រឡប់មកផ្ទះវិញដើម្បីស៊ើបឲ្យដឹងច្បាស់និងស្វែងរក។
គួរបញ្ជាក់ផងដែរថា កាលពីថ្ងៃទី១៩ធ្នូកន្លងទៅនេះ បុរសជាប្តីបានរាយការណ៍ប្រាប់សមត្ថកិច្ចថា កូនស្រីរបស់គាត់២នាក់បានបាត់ពីផ្ទះរយៈពេល៤ថ្ងៃហើយ មិនដឹងជាទៅទីណាទេ ។ បន្ទាប់ពីទទួលបានសេចក្តីរាយការណ៍រួច សមត្ថកិច្ចបានចុះធ្វើការស្រាវជ្រាវក៏ត្រូវពលរដ្ឋម្នាក់ប្រាប់ថា ក្មេងស្រី២នាក់នោះគាត់ជាអ្នកឲ្យបាយហូបរាល់ថ្ងៃ ដោយពួកនាងស្នាក់នៅក្នុងចម្ការរបស់អ្នកស្រុកហើយមិនហ៊ានត្រឡប់ទៅផ្ទះទេ ប្រហែលជាខ្លាចឪពុកវាយធ្វើបាបហើយមើលទៅ ។
យោងតាមសម្ដីកូនស្រីទាំង២នាក់ដែលម្នាក់ឈ្មោះ វ.ស.ណ អាយុ១ឆ្នាំ និងម្នាក់ទៀតឈ្មោះ វ.ច.ន អាយុ១១ឆ្នាំ បានរៀបរាប់ប្រាប់សមត្ថកិច្ចថា កាលពីវេលាម៉ោងប្រហែល១១យប់ ថ្ងៃទី១២ ធ្នូ២០១៦ ពេលឪពុកនាងស្រវឹងស្រាគាត់បានវាយធ្វើបាបពួកនាងយ៉ាងខ្លាំង។ ពួកនាងនិយាយថា គាត់មិនត្រឹមតែវាយធ្វើបាបពួកនាងទេ គាត់ថែមទាំងសម្លុយឲ្យពួកនាងស្រាតសម្លៀកបំពាក់អស់ ហើយស្ទាបអង្អែល ច្របាច់ និងឱបថើបខ្លួនទៀតផង ទើបពួកខ្លួនទ្រាំមិនបាននិងភ័យខ្លាចក៏នាំគ្នារត់ចេញពីផ្ទះតែម្តង ។
មកដល់ពេលនេះសមត្ថកិច្ចស្រុកសង្កែបញ្ជាក់ថា យោងតាមពាក្យបណ្ដឹងរបស់ប្រពន្ធ និងការរៀបរាប់របស់ក្មេងស្រីរងគ្រោះជាកូនទាំង២នាក់ សមត្ថកិច្ចក៏សុំគោលការណ៍ពីលោកព្រះរាជអាជ្ញា ធ្វើការឃាត់ខ្លួនជនសង្ស័យជាឪពុកយកមកផ្តន្ទាទោសតាមច្បាប់ ៕ ដោយ-ចន្ន័ឌី ភារម្យ
ផ្តល់សិទ្ធិដោយ៖VD7News.com
