ខេត្តព្រៃវែង៖ កាលពីវេលាម៉ោង១១និង៣០នាទីយប់ថ្ងៃទី១៧ ខែធ្នូ ឆ្នាំ២០១៦ នៅចំណុចផ្ទះរបស់ជនល្មើសឈ្មោះ ផាន់ ភឿន ភេទប្រុស អាយុ៤១ឆ្នាំ ស្ថិតក្នុងភូមិខ្យោកកណ្តាលឃុំពពឺស ស្រុកស្វាយអន្ទរ ខេត្តព្រៃវែង។ ដោយសារមានបុរសល្មោភកាមម្នាក់ ត្រូវបានសមត្ថកិច្ចចាប់វាយខ្នោះ ក្រោយពីធ្វើសកម្មភាពលួងលោមប្អូនស្រីបង្កើតរបស់ខ្លួនឲ្យមកកោសខ្យល់ឲ្យ រួចបិទភ្លើងធ្វើសកម្មភាពចាប់រំលោភទាល់តែបានសម្រេច។
យោងតាមលោកវរសេនីយ៍ទោ អ៊ុង ផាន អធិការនគរបាលស្រុកស្វាយអន្ទរបានឲ្យដឹងថា ស្ត្រីរងគ្រោះនៅក្នុងករណីចាប់រំលោភខាងលើមានឈ្មោះ វ.គ ភេទស្រី អាយុ៣៧ឆ្នាំ រស់នៅផ្ទះជាមួយគ្នា ដោយប្តីទៅធ្វើការនៅឯប្រទេសថៃ។
លោកបានបន្តទៀតថា នៅយប់កើតហេតុវេលាខាងលើ ជនសង្ស័យដែលត្រូវជាបងបង្កើតជនរងគ្រោះបានផឹកស្រាស្រវឹង ហើយបានលួងលោមប្អូនស្រីឲ្យមកកោសខ្យល់ឲ្យខ្លួន។ បន្ទាប់ពីកោសខ្យល់រួច ក៏បានឲ្យជនរងគ្រោះពន្លត់ភ្លើង បន្ទាប់មកក៏ធ្វើសកម្មភាពចាប់រំលោភប្អូនស្រីបង្កើតរបស់ខ្លួនរហូតបានសម្រេចតែម្តង។ ក្រោយមកភ្លាមៗនោះ ជនរងគ្រោះក៏បានរត់មកប្តឹងសមត្ថកិច្ចប៉ុស្តិ៍នគរបាលឃុំពពឺស ពេលនោះសមត្ថកិច្ចប៉ុស្តិ៍បានរាយការណ៍មកលោក លោកក៏បានបញ្ជាឲ្យសមត្ថកិច្ចរបស់លោកចុះទៅចាប់ឃាត់ខ្លួនជនសង្ស័យបានភ្លាមៗយកមកសួរនាំនៅប៉ុស្តិ៍ លុះព្រឹកថ្ងៃទី១៩ធ្នូ សមត្ថកិច្ចបានបញ្ជូនជនសង្ស័យមកសួរនាំនៅអធិការដ្ឋាននគរបាលស្រុកស្វាយអន្ទរ។
ប្រភពឲ្យដឹងថា ក្រោយពីសមត្ថកិច្ចបានសួរនាំ ជនសង្ស័យបានឆ្លើយសារភាពប្រាប់សមត្ថកិច្ចថា ខ្លួនពិតបានចាប់រំលោភប្អូនស្រីបង្កើតបានសម្រេចពិតប្រាកដមែន។
លោកអធិការក៏បានបញ្ជាក់ទៀតថា ជនសង្ស័យមានឈ្មោះ ផាន់ ភឿន ធ្លាប់មានប្រពន្ធដល់ទៅពីរទៅហើយ ដោយប្រពន្ធទី១ បានស្លាប់ ហើយជននេះបានយកប្រពន្ធទី២ទៀត។ ក្រោយមកប្រពន្ធទី២ ក៏រត់ចោលបាត់ទៀត លុះដល់ថ្ងៃកើតហេតុ ជនសង្ស័យផឹកស្រាស្រវឹង ក៏កើតចំណង់តណ្ហា បានចាប់រំលោភប្អូនស្រីបង្កើតរបស់ខ្លួនតែម្ដង។
បច្ចុប្បន្ន ជនសង្ស័យ ត្រូវបានឃាត់ខ្លួននៅអធិការដ្ឋាននគរបាលស្រុកស្វាយអន្ទរ ដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី នៃច្បាប់៕
ផ្តល់សិទ្ធិដោយ៖VD7News.com
