
សិល្បៈ ៖ គោលដៅធំរបស់អ្នកតារាចម្រៀងក្រៅពីកេរ្តិ៍ឈ្មោះ លុយក៏ជាកត្តាសំខាន់ដែរ ដូច្នេះហើយទើបពួកគេម្នាក់ៗខិតខំរិះរកគ្រប់មធ្យោបាយ ដើម្បីក្រសោបយកភាពល្បីល្បាញ និងទទួលបានឱកាសចេញកើបលុយពីការសម្ដែង។
យ៉ាងណាមិញក្នុងឆ្នាំ២០១៧នេះតារាចម្រៀងកញ្ញា យូរី បានប្រាប់ថា ព្រោះតែចង់បំពេញបំណងបង្កើនប្រជាប្រិយភាព និងបំពេញតាមតម្រូវចិត្តអ្នករៀបចំកម្មវិធីប្រគំតន្ត្រីនាងបានចាប់ដៃគូច្រៀងជាមួយអ្នកចម្រៀងរ៉េបមកពីប្រទេស អូទ្រីស។បញ្ជាក់ប្រាប់បន្ថែមមក Kqube.net ជុំវិញគម្រោងការងារសិល្បៈថ្មីៗនេះ យូរី បានប្រាប់ថាក្នុងឆ្នាំ២០១៧នាងមានបទចម្រៀងMelody ថ្មីជាច្រើនបទសម្រាប់ត្រៀមចេញលក់ជាបន្តបន្ទាប់តម្រូវតាមការចង់បានរបស់ទស្សនិកជន ហើយឆ្នាំនេះព្រោះតែទីផ្សារចេញច្រៀងតាមកម្មវិធីប្រគំតន្ត្រីមានច្រើនជាងឆ្នាំចាស់ នាងក៏បានបង្កើតក្រុមរាំនារីមួយក្រុមបន្ថែមទៀត ព្រោះអ្នករៀបចំកម្មវិធីជាច្រើនតែងសួរនាំនាងមានអ្វីថ្មី និងប្លែក ។
តារារូបនេះបន្តថា ក្រៅពីបង្កើតក្រុមរាំ ពេលនេះនាងក៏ទើបតែចាប់ដៃគូច្រៀងជាមួយអ្នកចម្រៀងរ៉េបមកពីប្រទេស អូទ្រីស ម្នាក់ ហើយពេលនេះពួកយើងក៏បានថតជា Audio បានមួយបទរួចហើយដែរ បទនេះក៏ត្រៀមចេញថត MV ក្នុងពេលឆាប់ៗនេះដែរ។ កញ្ញាបន្តថា ហេតុផលដែលនាងចាប់ដៃគូជាមួយអ្នកចម្រៀងរ៉េបស្រីម្នាក់ទៀត គឺមកពីនាងចង់មានអ្វីដែលថ្មី និងប្លែកឲ្យទស្សនិកជនបានឃើញ ម្យ៉ាងទៀតអ្នកចម្រៀងមកពី អូទ្រីស ក៏មានរូបសម្រស់ស្អាត និងមានទេពកោសល្យខ្លាំងផ្នែករ៉េប។
យូរី បញ្ជាក់ជូន Kqube.net បន្ថែមថា សម្រាប់គម្រោងចាប់ដៃគូនេះនាងក៏មានបទចម្រៀងជាច្រើនទៀតដែលត្រូវច្រៀងរួមគ្នា ហើយបទទាំងនេះពួកយើងកំពុងហាត់សម និងចូលថតសំឡេងជាបណ្ដើរ ហើយពេលនេះបទចម្រៀង និងវត្តមានពួកនាងចេញម្ដងនេះកញ្ញាមានការរំពឹងទុកថា នឹងធ្វើឲ្យមានការចាប់អារម្មណ៍ច្រើនជាក់ជាមិនខាន៕
ផ្តល់សិទ្ធិដោយ៖KQUBE



