បន្ទាប់ពីក្រសួងព័ត៌មានបានចេញលិខិតបញ្ឈប់ កម្មវិធី ABC 3 ស្ព្រីង ប្រធានសហភាពសហព័ន្ធអ្នកសារព័ត៌មានកម្ពុជា និងជាទីប្រឹក្សា ជាន់ខ្ពស់របស់ស្ថានីយទូរទស្សន៍ CTN, CNC, MyTV លោក ហ៊ុយ វណ្ណៈ បានបញ្ចេញសារគាំទ្រចំពោះចំណាត់ការរបស់ រដ្ឋមន្ត្រីក្រសួងព័ត៌មាន ទៅលើវិទ្យុ ABC កម្ពុជា FM ១០៧.៥ ហើយលោកបានលើកឡើងលើគណនីហ្វេសហ៊ុកផ្ទាល់ខ្លួនថា អ្នកសារព័ត៌មាននិងអ្នកឃោសនាលក់ទឹកផ្លែឈើ គឺខុសគ្នាដាច់ស្រឡះ។
បន្ថែមពីក្នុងសំណេរនៅលើគណនីហ្វេសប៊ុករបស់ប្រធានសហភាពសហព័ន្ធអ្នកសារព័ត៌មានកម្ពុជារូបនេះបានបញ្ជាក់យ៉ាងដូច្នេះថា៖ "ពិតជាមានការយល់ច្រឡំដោយខុសឆ្គង រវាង "អ្នកសារព័ត៌មាន" និង អ្នកបម្រើការងារក្នុងឧស្សាហកម្មផ្សព្វផ្សាយ។ មិនមែនរាល់អ្នកធ្វើការទាំងអស់នៅក្នុង វិទ្យុ និង ទូរទស្សន៍ គឺសុទ្ធតែជាអ្នកសារព័ត៌មាននោះទេ។ អ្នកសារព័ត៌មាន តិចឬច្រើនត្រូវតែទទួលការហ្វឹកហ្វឺនឱ្យចេះដឹង និងអនុវត្តក្រឹត្យក្រមសីលធម៌វិជ្ជាជីវៈសារព័ត៌មានឲ្យខ្ជាប់ខ្ជួន។
ដោយសារមានការយល់ច្រឡំតួនាទីនេះហើយ ទើបបានមួយរយៈនេះ ច្របូកច្របល់ប៉ាតណាប៉ាតណីគ្មានសណ្ដាប់ធ្នាប់ ហើយវាទៅជាចេញត្លុកពេញ វិទ្យុ ទូរទស្សន៍ អស់ទៅ។ បើមិនទាន់ដឹង ស្តាប់រៀមច្បង។ កុំដើរចាក់ថ្នាំពេញភូមិ ពេលខ្លួនមិនបានឆ្លងកាត់ការបណ្ដុះបណ្ដាលសាលាពេទ្យ។ គ្រោះថ្នាក់ណាស់។ បើអ្នកណាធ្វើអីក៏បាន ចាំបាច់មានសាលារៀនធ្វើអី!?”។
ជុំវិញសង្គ្រាមពាក្យសម្ដីនិងចំណាត់ការយ៉ាងក្តៅគគុកទៅវិទ្យុ ABC កម្ពុជា FM 107.5 ដែលត្រូវបានផ្សាយនៅលើប្រព័ន្ធផ្សព្វផ្សាយ ពិសេសនៅបណ្ដាញសង្គមនោះ គេក៏សង្កេតឃើញថា មានបងប្អូនប្រជាពលរដ្ឋមួយចំនួននៅបន្តគាំទ្រវិទ្យុ ABC កម្ពុជា ដោយចង់ឲ្យក្រុមការងារឬម្ចាស់វិទ្យុមួយនេះ បន្ទន់ឥរិយាបថបន្តិច មកសុំការអភ័យទោស ចរចារជាមួយក្រសួង ដើម្បីអាចបន្តការងារមនុស្សធម៌ជួយដល់បងប្អូនខ្មែរដែលជួបការលំបាកតទៅទៀត។យ៉ាងណាមិញគេនៅមិនទាន់ឃើញមានការតបត ឬប្រតិកម្មរបស់គណៈគ្រប់គ្រងវិទ្យុខាងលើនៅឡើយទេ គិតមកដល់ព្រឹកថ្ងៃទី២៥ ខែមករា ឆ្នាំ២០១៧នេះ ប៉ុន្តែបើងាកទៅមើល ហ្វេសប៊ុកផេករបស់វិទ្យុមួយនេះ ឃើញថា បានប្តូរ Profile និង Coverរបស់ខ្លូន ពីរូបភាពថតជុំគ្នា និងមានពាក្យABC Cambodia Family នោះទៅជា ផ្ទៃពណ៌ប៉ៃតងខ្ចីទាំងអស់៕
ផ្តល់សិទ្ធិដោយ៖KQUBE
