ក្រោយចេញលិខិតមួយផ្ញើទៅម្ចាស់ទូរទស្សន៍ប៉ុស្តិ៍លេខ៣ រាជធានីភ្នំពេញ ដើម្បីឲ្យបញ្ឈប់ការសហការជាមួយវិទ្យុABC FM១០៧.៥ ក្នុងការផលិតកម្មវិធី ABC 3 ស្រ្ពីង កាលល្ងាចថ្ងៃម្សិលមិញ បន្ទាប់ពីមានសង្គ្រាមពាក្យសម្តីជាមួយមិត្តអ្នកលេងក្នុងបណ្ដាញសង្គម លើសកម្មភាពរបស់ពីធីការម្នាក់របស់ABC លោតផ្លោះតុ ខណៈកំពុងផ្សាយផ្ទាល់នោះ នៅព្រឹកថ្ងៃទី២៥ មករានេះ រដ្ឋមន្ត្រីខៀវ កាញារីទ្ធក៏បានបញ្ចេញសារខ្លីមួយទៀតថា៖ "ក្នុងពិភពសារព័ត៌មាន មិនដូចក្នុងឆាកល្ខោន ហើយក៏មិនដូចក្នុងរឿងចិនកាប់ដាវទេ"។
សារខ្លីនេះពិតជាមានអត្ថន័យ ដើម្បីឲ្យមហាជន ឬបុគ្គលពាក់ព័ន្ធគួរយកទៅពិចារណាឡើងវិញ ប្រសិនជាចង់បន្តប្រឡូកក្នុងវិស័យសារព័ត៌មាន កុំចេះតែហ៊ានធ្វើសកម្មភាពភាពដែលខ្លួនធ្វើសុទ្ធតែត្រឹមត្រូវនោះ។ ក្នុងសំណេរនៅលើគណនីហ្វេសប៊ុក របស់ឯកឧត្តម រដ្ឋមន្ត្រី បញ្ជាក់ថាទៀតថា៖" ពិភពលោកមិនមែនមានតែ‹‹ស›› ហើយនឹង ‹‹ខ្មៅ››នោះទេ តែមានប្រផេះច្រើន ហើយមិនអាចសន្សំពិន្ទុទុកកាត់ទឹកក៏អត់ដែរ។ ហេតុនេះត្រូវចាំថា ទូទាត់ មិនដូច ទាត់ទូទេ ហើយទៀងទាត់ខុសពី ទាត់ទៀង ពិសេសបើមេអង្គភាពប្រឆាំងពុករលួយជាមុខសញ្ញានៃការទាត់នោះទៀត គឺធ្ងន់ណាស់"៕
