រាជធានីភ្នំពេញ៖ កុមារក្រីក្រកម្ពុជាមានសង្ឃឹមបន្តទៀតហើយ បន្ទាប់ពីអ្នកឧកញ៉ា ហុង ពីវ នៅវេលាព្រឹកថ្ងៃទី០៦ ខែមករា ឆ្នាំ២០១៧នេះ នៅទីស្នាក់ការកណ្តាលក្រុមហ៊ុនពិភពថ្មីគ្រុប បានបរិច្ចាគថវិកា ២លានដុល្លារអាមេរិក ប្រគល់ជូនផ្ទាល់ដៃដល់លោកវេជ្ជបណ្ឌិត Beat Richner ស្ថាបនិក និងជាប្រធានមន្ទីរពេទ្យគន្ធបុប្ផា ដើម្បីបន្តជួយសង្គ្រោះជីវិតកុមារនៅកម្ពុជា។
នេះជាលើកទី២ហើយ ដែលអ្នកឧកញ៉ាចិត្តសប្បុរសរូបនេះ និងក្រុមគ្រួសារ បានបរិច្ចាគថវិកាជូនដល់លោកវេជ្ជបណ្ឌិត Beat Richner ប្រធាននិងជាស្ថាបនិកនៃមន្ទីរពេទ្យគន្ធបុប្ផា បន្ទាប់ពីលើកទី១ លោកបានផ្តល់ថវិកា១លាន ដុល្លារ ដល់មន្ទីរពេទ្យគន្ធបុប្ផាដែលកំពុងត្រូវការថវិកាជាចាំបាត់ក្នុងការចំណាយគ្រឿងបរិក្ខារពេទ្យនិងថ្នាំពេទ្យ ដើម្បីជួយសង្គ្រោះដល់កុមារកម្ពុជារាប់សែននាក់ក្នុងមួយឆ្នាំៗ។
សូមបញ្ជាក់ថា មន្ទីរពេទ្យគន្ធបុប្ផាមានចំនួន៥ទីតាំង ដោយ៤កន្លែងនៅរាជធានីភ្នំពេញ និងមួយទីតាំងទៀត ក្នុងខេត្តសៀមរាប ហើយបើគិតពីចំនួននៃការផ្តល់សេវាព្យាបាលក្នុងមួយថ្ងៃៗមន្ទីរពេទ្យគន្ធបុប្ផា ទទួលការព្យាបាលចាប់ពី១៦០០ ទៅ ២០០០នាក់ដល់កុមារកម្ពុជាដោយឥតគិតថ្លៃ៕
ផ្តល់សិទ្ធិដោយ៖KQUBE
