ខេត្តព្រះសីហនុ៖ ឯកឧត្តម ឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា៖ នៅរសៀល ថ្ងៃទី២៥ ខែមករា ឆ្នាំ២០១៧ វេលាម៉ោង14:30នាទី (ជាថ្ងៃរឹតបន្តឹងទី២) នៅតាមផ្លូវជាតិលេខ៤ ក្នុងស្រុកព្រៃនប់ ចំណុចជញ្ជីងអូរចំណារ ក្រុមត្រួតពិនិត្យចល័ត បាន ឃើញអ្នកបើកបរ រថយន្តដឹកទំនិញ របស់ក្រុមហ៊ុន KAT បញ្ឈប់រថយន្ត ហើយនាំគ្នាផឹកគ្រឿងស្រវឹង ។
លុះដល់ពេលឡើងបើកបរ សមត្ថកិច្ច បានវាស់ជាតិអាកុល បានរកឃើញថាមានការផ្ទុកលើសកំណត់ ដូច្នេះ សមត្ថកិច្ចយើងបានទំនាក់ទំនងទៅម្ចាស់ក្រុមហ៊ុនឲ្យ រកមនុស្ស មកបើកជំនួស បើរកមនុស្សមកបើកជំនួសមិនបាន មិនអនុញ្ញាតឲ្យអ្នកបើកបរនោះ ឡើងបើករថយន្ត ធ្វើសកម្មភាពលើផ្លូវបាននោះឡើយ ។
ឯកឧត្តមស្នងការ បានបញ្ជាក់ថា៖ ខ្ញុំបានបញ្ជា ឲ្យសមត្ថកិច្ច ឆ្មក់ត្រួតពីដើមទីរួចហើយ អ្នកបើកបរទាំងនោះមិនអាចផឹកបាន ក៏បបួលគ្នាមកផឹក នៅកណ្ដាលទីវិញ ទើបខ្ញុំបាទបញ្ជាជាដាច់ខាតត្រូវតែដេញតាមឲ្យទាន់ ពួកខូចទាំងនេះតែងតែបើកបរ បង្ករគ្រោះថ្នាក់តាមដងផ្លូវ និងវ៉ាជែង មិនក្រែងរអែងទាំងអស់ ពេលមានគ្រោះថ្នាក់ម្ដងៗ អ្នកបើកបររត់គេចខ្លួនរហូត ទើបក្នុងនាមខ្ញុំបាទជាស្នងការ បានដាក់វិធានការឲ្យចល័តតាមដងផ្លូវ គឺពិតជាមានការឈប់រថយន្ត ហើយនាំគ្នាផឹកគ្រឿងស្រវឹងគ្រប់ៗគ្នាបែបនេះមែន។
ផ្តល់សិទ្ធិដោយ៖VD7News.com
