សិល្បៈ ៖ សែចិនមានតំណមមួយគឺអ្នកនៅលីវហាមដាច់ខាតមិនឲ្យជូន អាំងប៉ាវ ទៅណាម្នាក់ទេ មិនថាអ្នកនោះជាសាច់ញាតិ ឬអ្នករាប់អានគ្នាឡើយ ព្រោះមានជំនឿថា ធ្វើឲ្យកាត់លាភសំណាងរបស់ខ្លួនទៅឲ្យអ្នកផ្សេង។ បញ្ហានេះក៏មានអ្នកសិល្បៈកូនចៅចិនខ្លះតម តែក៏មានអ្នកខ្លះមិនជឿលើតំណមនេះដែរ។ ខាងក្រោមនេះគឺជាបទសម្ភាសតារាល្បីៗជាច្រើនរូបនិយាយពីការជូនអាំងប៉ាវទៅឲ្យអ្នកដទៃ។
សុខ ពិសី ៖ សម្រាប់តារាចម្រៀង សុខ ពិសី បានប្រាប់ថា នាងក៏ជាប់សែស្រឡាយចិន ហើយក៏បានរៀបចំសែនជូនជីដូនជីតាកុងម៉ាជារៀងរាល់ឆ្នាំផងដែរ ប៉ុន្តែសម្រាប់ជំនឿថា កូនចៅចិនអ្នកនៅលីវហាមមិនឲ្យជូនអាំងប៉ាវទៅអ្នកដទៃ ព្រោះខ្លាចកាត់លាភសំណាងនោះ នាងមិនជឿទាំងស្រុងទេ ព្រោះជារៀងរាល់ឆ្នាំនាងបានជូនអាំងប៉ាវទៅប្អូនៗ និងសាច់ញាតិមិនដែលខានឡើយ ហើយទង្វើដ៏ល្អនេះនាងមិនដែលឃើញមានលទ្ធផលមិនល្អធ្វើឲ្យនាងបរាជ័យលើការងារអ្វីមួយនោះទេ គឺក្នុងមួយឆ្នាំៗភាពជោគជ័យរបស់នាងបានកើតឡើងជាបន្តបន្ទាប់។
អេនីហ្សាម៖ បញ្ជាក់ប្រាប់លោក តាន់ ចន្ថា អ្នកផលិតព័ត៌មាន Kqube.net កញ្ញា អេនីហ្សាម បាននិយាយថា នាងក៏ជាប់សែចិនតិចតួចដែរ ហើយគ្រួសារនាងបានធ្វើពិធីសែនព្រេនគ្រប់កម្មវិធីទាំងអស់មិនថា ចូលឆ្នាំ ឆេងម៉េង សែនក្បាលទឹក... គឺនាងតែងចូលរួមដុតភូបសុំក្ដីសុខមិនដែលខានទេ។ ប៉ុន្តែសម្រាប់តំណមគេថា អ្នកនៅលីវហាមមិនឲ្យជូនអាំងប៉ាវទៅអ្នកដទៃនាំឲ្យកាត់លាភសំណាងនោះ នាងមិនដែលគិតហើយក៏មិនដែលតមដែរ គឺនាងជូនប្អូនៗតែរហូត តែនាងក៏មិនបានកត់ចំណាំមើលពីលាភសំណាងរបស់ខ្លួនដែរ គឺការរស់នៅតែងមានការងារខ្លះជោគជ័យ និងការខ្លះមិនជោគជ័យជារឿងគេចមិនផុតឡើយ។
យូរី៖ សម្រាប់តារាចម្រៀងសម្បូរស្តាយកញ្ញា យូរី បានប្រាប់ថា ចំពោះបញ្ហាតំណមកូនចៅចិននៅលីវហាមជូនអាំងប៉ាវគេ គឺនាងធ្លាប់ឮប៉ាម៉ាក់ និងកុងម៉ានិយាយពិតមែន ប៉ុន្តែនាងមិនបានធ្វើតាមទេ ព្រោះជារៀងរាល់ឆ្នាំនាងតែងឲ្យអាំងប៉ាវទៅក្មួយៗមិនដែលខានទេ ហើយនាងក៏មិនជឿថា ការធ្វើដូច្នេះនាំឲ្យដាច់លាភសំណាងដែរ ព្រោះការមានបាន និងភាពជោគជ័យលើកការងារអ្វីមួយគឺទទួលបានមកពីការខិតខំតស៊ូ និងភាពវ័យឆ្លាតរបស់យើងម្នាក់ៗទៅវិញទេ។
អេនឌី៖ តារាចម្រៀង និងសម្តែងលោក អេនឌី បានប្រាប់ Kqube.net ដែរថា រឿងតំណមអ្នកនៅលីវជូនអាំងប៉ាវទៅអ្នកដទៃនោះ មកដល់អាយុប៉ុននេះលោកមិនទាន់ហ៊ានជូនទៅអ្នកម្នាក់ទេ ព្រោះចំណុចនេះប៉ាម៉ាក់របស់លោក បានណែនាំតគ្នាមកកូនចៅគឺហាមជូនអាំងប៉ាវដាច់ខាត់។ លោក អេនឌី បន្តថា ប៉ុន្តែសម្រាប់ការជូនលុយទៅអ្នកផ្សេងក្នុងពិធីបុណ្យចូលឆ្នាំចិន ដោយមិនដាក់ក្នុងអាំងប៉ាវ គឺលោកបានធ្វើជារៀងរាល់ឆ្នាំ ព្រោះនេះជាដំណោះស្រាយដ៏ល្អមួយសម្រាប់ការធ្វើទឹកចិត្តសប្បុរស។
សុគន្ធ ថេរ៉ាយុ៖ ក៏បានប្រាប់ដែរថាចំពោះជំនឿថា កូនចៅចិននៅលីវហាមមិនឲ្យអាំងប៉ាវគេនោះលោកធ្លាប់ឮ ប៉ុន្តែលោកមិនដែលបានតំណមទេ គឹជារៀងរាល់ឆ្នាំលោកជូនអាំងប៉ាវប្អូនៗ ម៉ាក់ កុង និងម៉ាតែរហូតមិនឃើញមានបញ្ហាអ្វីទេ គឺការងាររបស់លោកពីមួយឆ្នាំទៅមួយឆ្នាំកាន់តែជោគជ័យ៕
ផ្តល់សិទ្ធិដោយ៖KQUBE
