ប្រទេស ប៉ាគីស្ថាន បានឃុំឃាំងក្នុងផ្ទះនូវបុរសឈ្មោះ សាហ្វីស សាអ៊ីដ (Hafiz Saeed) ជាអ្នកដែលសហរដ្ឋអាមេរិក និង ប្រទេស ឥណ្ឌា ចោទថាជាមេខ្លោងក្នុងការវាយប្រហារឆ្នាំ 2008 សម្លាប់មនុស្ស ១៦៦ នាក់ ក្នុងទីក្រុង មុំបៃ ប្រទេស ឥណ្ឌា ។
វិធានការរបស់អាជ្ញាធរ ប៉ាគីស្ថាន ធ្វើឡើងដោយពីមានសម្ពាធច្រើនឆ្នាំ ដែលទាមទារឲ្យរដ្ឋាភិបាលទីក្រុង អ៊ីស្លាម៉ាបាត កាត់ទោស សាអ៊ីដ និងជាវិធានការដែលអាចធ្វើឲ្យធូរស្រាលដល់ភាពតានតឹងរវាងប្រទេស ឥណ្ឌា និង ប៉ាគីស្ថាន ដែលជាប្រទេសជិតខាងមានទំនាស់នយោបាយដ៏យូរអង្វែង ។ សហរដ្ឋអាមេរិក បានសន្យាផ្ដល់ប្រាក់ ១០ លានដុល្លារ សម្រាប់ព័ត៌មាននាំទៅរកការចាប់ខ្លួន សាអ៊ីដ ដែលជាមេដឹកនាំអង្គការសប្បុរសធម៌ឥស្លាម ចាម៉ាអាត-អ៊ុត-ដាវ៉ា ជាក្រុមដែល អាមេរិក ជឿថា ជាអ្នកដឹកនាំក្រុមជីវពលមានមូលដ្ឋានក្នុងប្រទេស ប៉ាគីស្ថាន ឈ្មោះ ឡាស្កា-អ៊ី-តេបា ។
លេខាព័ត៌មានរបស់អង្គការសប្បុរសធម៌ឥស្លាម ចាម៉ាអាត-អ៊ុត-ដាវ៉ា និយាយថា សាអ៊ីដ ស្ថិតក្រោមការឃុំឃាំងក្នុងផ្ទះ ដោយមានប៉ូលិសមួយក្រុមបានទៅដល់មូលដ្ឋានរបស់អង្គការ និងបានបញ្ជាក់អំពីការឃុំខ្លួននេះ ។ ទោះយ៉ាងណា សាអ៊ីត បដិសេធចំពោះការជាប់ពាក់ព័ន្ធក្នុងការបំផ្ទុះគ្រាប់បែកក្នុងទីក្រុង មុំបៃ ប្រទេស ឥណ្ឌា ឆ្នាំ ២០០៨ ប៉ុន្តែការអនុញ្ញាតឲ្យ សាអ៊ីត មានសេរីភាព ធ្វើឲ្យប្រេះស្រាំដល់ទំនាក់ទំនងរវាង ឥណ្ឌា និង ប៉ាគីស្ថាន ព្រមទាំង សហរដ្ឋអាមេរិក ។
លេខាព័ត៌មានរបស់អង្គការសប្បុរសធម៌ឥស្លាម បញ្ជាក់ថា ប៉ាគីស្ថាន ទទួលសម្ពាធពី អាមេរិក ដោយប្រឈមនឹងការដាក់ទណ្ឌកម្ម ប្រសិនបើមិនដាក់ទោស សាអ៊ីត ។
ផ្តល់សិទ្ធិដោយ៖KQUBE
