រាជធានីភ្នំពេញ៖ ការសន្ដោសការប្រណី ការចែករំលែក ពីសំណាក់អ្នកមាននិងអ្នកក្រ រវាងមនុស្សចាស់និងមនុស្សក្មេង និងពីមនុស្សក្មេងទៅមនុស្សចាស់វិញ គឺជាសន្តានរបស់មនុស្សដែលមានគុណធម៌ក្នុងខ្លួន មិនមែនជាអ្នកដែលគិតបែបអាត្មានិយម។
តួយ៉ាងដូចជាលោក ឧកញ៉ា ស្រី ចាន់ថន ទាក់ទងជាមួយនិងទង្វើរបស់គាត់នៅក្នុងថ្ងៃនេះជាដើម ទោះបីជាកុមារជាអ្នកលក់ផ្កាម្នាក់នេះមិនធ្លាប់ជាអ្វីនិងលោកពីមុនមកក៏ដោយ តែសំខាន់ការប្រើចិត្តមេត្តារបស់រូបលោកទៅកាន់ក្មេងប្រុសម្នាក់នោះ ប្រកបដោយចិត្តអាណិតស្រលាញ់។ អាចនិយាយបានថាជានិស្ស័យ ដែលធ្វើអោយមនុស្សពីរដែលមិនធ្លាប់ស្គាល់គ្នា តែពេលជួបប្រាស្រ័យបែរជាមានភាពជិតដិត ឬថា "និយាយត្រូវគ្នា"។
ក្នុងទំព័រហ្វេសប៊ុករបស់លោកឧកញ៉ា ស្រី ចាន់ថន បានសរសេរសំណេរមួយដោយលើកឡើងថា "យប់មិញចៃដន្យបានជួប នឹងប្អូនប្រុសលក់ផ្កា ហើយក៏បានហៅប្អូនមកអង្គុយញ៉ាំបបរ និងនិយាយលេងជាមួយប្អូន មានអារម្មណថាត្រូវគ្នា។ ជាការពិតទៅ មនុស្សគឺមានតម្លៃរបស់មនុស្សរៀងៗខ្លួន និងការគិតផ្សេងៗគ្នា មិនថាពួកគេស្ថិតនៅក្នុងស្ថានភាពបែបណានោះទេ ដូចនេះសូមឲ្យយើងទាំងអស់គ្នាចេះឲ្យតម្លៃ ការដឹងគុណ និងការគោរពគ្នាទៅវិញទៅមក"។
ដូចការលើកឡើងរបស់លោកខាងលើ មនុស្សម្នាក់ៗ មិនថាគេរស់ក្នុងស្ថានភាពជាអ្វីក៏ដោយ គេមានតម្លៃរបស់គេរៀងៗខ្លួន ហើយគេក៏មានចំណុចពិសេសប្រចាំខ្លួនរបស់គេ ដែលយើងមិនមាន។ តាមរយៈសកម្មភាពរបស់លោកខាងលើ យើងគ្រាន់តែចង់រំលេចជាស្មារតីថា ការសន្ដោសការផ្ដល់ក្តីស្រលាញ់ ការបំពេញក្តីបំណងរបស់មនុស្សម្នាក់ ទៅតាមលទ្ធភាពរបស់យើង នោះហើយជាសេចក្ដីសុខផ្លូវចិត្តដែលមិនអាចយកលុយទៅទិញបាន៕
ផ្តល់សិទ្ធិដោយ៖KQUBE
