សិល្បៈ៖ តារាកំប្លែងនាយចេក កំពុងតែមានជីវភាពក្រីក្រលំបាកផង ពេលនេះប្រពន្ធរបស់គាត់ ត្រូវសង្គ្រោះបន្ទាន់នៅមន្ទីរពេទ្យក្រុងតាខ្មៅ មកមិនទាន់បានយូរប៉ុន្មានផង ស្រាប់តែគេប្រាប់ថាម្ដាយខ្សោយកម្លាំងខ្លាំង ហើយត្រូវយកមកសង្គ្រោះបន្ទាន់ទៀត។ តែអ្វីដែលកាន់តែខ្លោចផ្សារទៀតនោះ គ្រូពេទ្យប្រាប់ថា អ្នកទាំងពីរត្រូវយកមកសង្គ្រោះបន្ទាន់នៅភ្នំពេញ តែនាយចេកសុំត្រឹមពេទ្យខេត្ត ព្រោះតែគ្មានប្រាក់។
យោងតាមការចុះផ្សាយរបស់ទំព័រហ្វេសប៊ុករបស់តារាសម្ដែង អឹម ជីវ៉ា បានឲ្យដឹងនៅមុននេះ នាល្ងាចថ្ងៃទី១៦ ខែមករា ថា " តារាកំប្លែងនាយចេក ដែលមានជីវភាពក្រីក្រលំបាក ពេលនេះប្រពន្ធរបស់គាត់ត្រូវសង្គ្រោះបន្ទាន់នៅមន្ទីរពេទ្យក្រុងតាខ្មៅ ហើយគ្រូពេទ្យបានប្រាប់ថា ជំងឺប្រពន្ធនាយចេកធ្ងន់ធ្ងរ អោយយកទៅព្យាបាលនៅទីក្រុងភ្នំពេញ តែដោយគ្មានលុយនាយចេកសុំគ្រូពេទ្យព្យាបាលនៅមន្ទីរពេទ្យជ័យជំនះក្រុងតាខ្មៅ"។
"នាយចេកបាននិយាយថា ទោះបីជាលំបាកយ៉ាងណា ក៏មិនដូចថ្ងៃនេះដែរ លេងភ្លេងបាន50$មកដល់ផ្ទះយកប្រពន្ធមកពេទ្យជ័យជំនះ ពេទ្យប្រាប់ត្រូវវះកាត់ មិនទាន់បានរួចរាល់ផង គេប្រាប់ថាម្ដាយខ្សោយកម្លាំងខ្លាំង ហើយយកមកពេទ្យខេត្តទៀត មកដល់សង្គ្រោះបន្ទាន់គេប្រាប់ថា គាត់បេះដូងរីក លើសឈាម និងឈឺក្រពះ ត្រូវបញ្ជូន មកភ្នំពេញទៀត។
នាយចេកបន្តថា "ដោយគ្មានលទ្ធភាព ក៏សុំពេទ្យនៅត្រឹមពេទ្យខេត្ត ក្រែងគាត់បានធូរ យកទៅផ្ទះវិញសិនចាំគិតបន្តទៀត ហើយក៏មិនដឹងគិតយ៉ាងណាដែរ បើគ្មានអីទីពឹងសោះ មានតែដោះស្រាយរបស់របរអីមួយចំនួនសិនចុះ អោយតែបានរស់ជួបជុំគ្នាក៏ខ្ញុំសប្បាយចិត្តដែរ"៕
ផ្តល់សិទ្ធិដោយ៖ KQUBE
