ខេត្តកំពត៖ ជីវិតស្ត្រីចំណាស់ដ៏អភព្វម្នាក់ធ្លាប់ប្តីស្លាប់ចោលតាំងពីឆ្នាំ១៩៩១ ក្រោមក្រញាំពួកបីសាចខ្មែរក្រហមជាអ្នកសម្លាប់ បន្ទាប់មករស់នៅជាស្ត្រីមេម៉ាយចិញ្ចឹមកូនបីនាក់យ៉ាងទុក្ខវេទនា ដោយមានកូនស្រីពីរនាក់ និងកូនប្រុសពៅម្នាក់ ប៉ុន្តែមួយឆ្នាំកន្លងទៅ កូនប្រុសពៅត្រូវបានឡានបុកស្លាប់ លុះមកដល់ឆ្នាំនេះកូនស្រីទី២ ត្រូវបានស្លាប់ទៀត ហើយបានបន្សល់ទុកនៅកូនពីរនាក់ ស្ថិតនៅលើការទទួលខុសត្រូវរបស់ជីដូនទាំងស្រុង ព្រោះឪពុកពួកគេបានលះលែងគ្នាតាំងពី៦ឆ្នាំមុនម្ល៉េះ។
លោកយាយ ឯក ស៊ីន បច្ចុប្បន្នមានអាយុ៧២ឆ្នាំ ត្រូវជាជីដូនរបស់ក្មេងៗដែលត្រូវបានម្ដាយស្លាប់ចោលកាលពីប៉ុន្មានថ្ងៃមុននេះបានឲ្យដឹងថា កូនស្រីរបស់គាត់មានឈ្មោះ ស៊ិន កប ស្លាប់ក្នុងអាយុ៤២ឆ្នាំ ដោយជំងឺដួលដាច់សរសៃឈាម ខណៈដែលរូបគេបានមកធ្វើការជាកម្មករតាមផ្ទះគេនៅទីក្រុងភ្នំពេញ។ ស្ត្រីរូបនេះបានបន្តថា ពីដើមឡើយជីវភាពគាត់ត្រូវបានកូនមួយនេះជាអ្នកទទួលខុសត្រូវ ដោយកូនគាត់តែងខិតខំធ្វើការ ដើម្បីបានលុយផ្ញើឲ្យគាត់ចិញ្ចឹមចៅ ដែលជាកូនរបស់គេជារៀងរាល់ខែ ប៉ុន្តែឥឡូវនេះកូនស្រីដែលធ្លាប់ជួយគាត់ គេបានស្លាប់ទៅហើយ ដូច្នេះជីវិតគាត់ និងចៅៗពីរនាក់ទៀត មិនដឹងរស់នៅពឹងផ្អែកទៅអ្វីទេ ព្រោះដីស្រែក៏លក់ធ្វើបុណ្យសពកូនជិតអស់ នៅសល់តែដីស្រែ៨ផ្លូន ឥឡូវពេលកូនស្លាប់គ្មានលុយធ្វើបុណ្យក៏យកទៅបញ្ចាំគេអស់ទៀត។
ជីដូនដ៏កម្សត់នេះបានឲ្យដឹងទៀតថា ជីវិតគាត់មិនដឹងកម្មពៀរអ្វីទេ ដំបូងមានក្មួយម្នាក់មកពីថ្មសមកដេកមើលជំងឺនៅផ្ទះគាត់ មិនយូរប៉ុន្មានក្មួយនោះក៏បានស្លាប់ទៅ ក្រោយគ្នាមួយឆ្នាំក៏កូនប្រុសពៅរបស់គាត់ត្រូវឡានបុកស្លាប់ទៀត លុះប៉ុន្មានថ្ងៃមុននេះត្រូវកូនស្រីដែលជាអ្នកទទួលបន្ទុកគ្រួសារធំជាងគេបានឈឺមកមើលជំងឺនៅផ្ទះបាន៣ថ្ងៃ រួចទៅពេទ្យក្រមួនស(វៀតណាម)ចំនួនថ្ងៃ៣ និងត្រលប់មកផ្ទះវិញបាន៣ថ្ងៃទៀត ក៏បានស្លាប់តែម្ដង។ លោកយាយបានបញ្ជាក់ថា សព្វថ្ងៃគ្មានអ្វីពឹងទៀតទេ គឺចៅនៅតូចៗណាស់ ចៅទី១ឈ្មោះ បូ គីមអេង ភេទស្រី អាយុ ១១ឆ្នាំ ទី២ ឈ្មោះ បូ ម៉េងហ៊ាង ភេទប្រុស អាយុ ៦ឆ្នាំ។
ពួកគេគាត់ជាអ្នកមើលថែតាំងពីតូចៗមកម្ល៉េះ ដោយម្ដាយគេជាអ្នកផ្ដល់ថវិកាមកចិញ្ចឹម។ ប៉ុន្តែពេលនេះគ្មានទៀតទេ មានតែអំពាវនាវដល់សប្បុរសជនជួយដល់រូបគាត់ និងចៅៗផង គាត់នៅសល់កូនស្រីច្បងម្នាក់ទៀតដែរ តែកូនមួយនេះមានជីវភាពក្រីក្រណាស់ ចិញ្ចឹមតែកូនៗគេស្ទើរមិនចង់រស់ផង។ សូមបញ្ជាក់ថា គ្រួសារទីទាល់ក្រនេះ ស្ថិតនៅភូមិភ្នំក្ងាបខាងលិច ដែលជាដែនរដ្ឋបាលភូមិបាយទាពីមុន ប៉ុន្តែប្រជាជន៤-៦គ្រួសារនោះបានសុំចូលទៅក្នុងសមាជិកភូមិភ្នំក្ងាបវិញ។
នេះបើតាមការបញ្ជាក់កន្លងមករបស់លោក ថៃ ជីវ មេឃុំស្វាយទងខាងជើង។ ដោយឡែកចំពោះស្ថានភាពផ្ទះលោកយាយ ឯក ស៊ីន គឺមានដូចរូបខាងក្រោយគាត់ឈរស្រាប់ ហើយដំបូលលើក៏បានលេចជាបណ្ដើរៗហើយដែរ ដូច្នេះបើសប្បុរសជនណាមានសទ្ធាជ្រះថ្លាចង់ជួយដល់គាត់នោះ អាចចុះទៅដល់មូលដ្ឋានខាងលើដោយផ្ទាល់ ឬសាកសួរព័ត៌មានបន្ថែមតាមរយៈលោក ថៃ ជីវ មេឃុំស្វាយទងខាងជើង 012 773 176 ឬលោក ចេង ចំរើន ភ្នាក់ងារព័ត៌មាន Kqube.net 015 673 331៕ សូមអរព្រះគុណ និងអរគុណ!
ផ្តល់សិទ្ធិដោយ៖KQUBE
