សិល្បៈ ៖ ក្នុងឱកាសពិធីបុណ្យចូលឆ្នាំប្រពៃណីចិនជិតចូលមកដល់ អ្នកមានគ្រួសារ និងរៀមច្បងក្នុងគ្រួសារដែលជាប់សែស្រឡាយចិនបានត្រៀមអាំងប៉ាវ សម្រាប់ជូនកូនចៅ បងប្អូន និងអ្នកធ្លាប់ស្គាល់ជាមិនខាន។ ដោយឡែកសម្រាប់តារាចម្រៀងកូនចៅចិន លី អ៊ីវ៉ាធីណា បានប្រាប់ Kqube.net ថាជាច្រើនឆ្នាំមកនេះ នាងមិនដែលបានឲ្យអាំងប៉ាវទៅអ្នកណាម្នាក់ទេ។
ចង់ដឹងទេ! ហេតុអ្វីបានជាតារាចម្រៀងវ័យខ្ទង់៣០ឆ្នាំ លី អ៊ីវ៉ាធីណា មិនទាន់បានឲ្យអាំងប៉ាវទៅប្អូនៗ ឬអ្នកធ្លាប់ស្គាល់គ្នា ? បញ្ហានេះត្រូវបានកញ្ញាប្រាប់ពីមូលហេតុថា សម្រាប់រូបនាង ជាកូនចៅចិន កាន់ទំនៀមទម្លាប់ប្រពៃណីចិន ដូច្នេះហើយសម្រាប់អ្នកនៅលីវមិនទាន់មានគ្រួសារ គឺមិនអាចឲ្យអាំងប៉ាវទៅអ្នកណាម្នាក់ទេ គឺចាំទទួលយកអាំងប៉ាវពីអ្នកផ្សេងជូនវិញ។
កញ្ញាបន្តថា បើតាមការណែនាំប្រាប់ពីចាស់ទុំ និងប៉ាម៉ាក់ គឺពួកគាត់បាននិយាយថា អ្នកនៅលីវបើឲ្យអាំងប៉ាវទៅអ្នកផ្សេងគឺកាត់លាភ ដាច់ហុងស៊ុយរបស់ខ្លួន ដូច្នេះហើយរហូតមកដល់ពេលនេះនាងមិនទាន់ហ៊ានជូនអាំងប៉ាវទៅអ្នកណាម្នាក់ទេ ព្រោះកាន់តំណមនេះ។
លី អ៊ីវ៉ាធីណា បន្តប្រាប់ Kqube.net ទៀតថា ចំពោះតំណមដែលចាស់ទុំប្រាប់នេះ នាងក៏មិនបានកត់ចំណាំមើលដែរ បើសិនអ្នកនៅលីវហើយបានឲ្យអាំងប៉ាវទៅអ្នកណាម្នាក់ វាបណ្ដាលឲ្យកាត់លាភដូចការណែនាំប្រាប់ ឬអត់នោះទេ តែសម្រាប់សាច់ញាតិរបស់នាង គឺអ្នកនៅលីវមិនថាក្រមុំចាស់អាយុប៉ុន្មានឆ្នាំទេ គឺមិនហ៊ានឲ្យអាំងប៉ាវទៅគេដាច់ខាត៕
ផ្តល់សិទ្ធិដោយ៖KQUBE
