ខេត្តបាត់ដំបង៖ វប្បធម៌សង្គមធ្លាក់ចុះ ដោយសារអ្វី? ហេតុអ្វីទើបមនុស្សប្រែជាព្រៃផ្សៃមិនលើកលែងសូម្បីតែក្មេង..សមត្ថកិច្ចបានធ្វើការឃាត់ខ្លួនបុរសម្នាក់ភ្លាមៗ ដែលស្ថិតនៅភូមិចាមរអា ឃុំព្រៃស្វាយ ស្រុកមោងប្ញស្សី ខេត្តបាត់ដំបង បន្ទាប់ពីម្ដាយក្មេងស្រីរងគ្រោះប្ដឹងចោទថា បានចាប់កូនស្រីគាត់អូសចេញពីក្នុងផ្ទះទាំងកំរោល យកទៅរំលោភរហូតបានសម្រេច ខណៈជីដូនកំពុងដេកក្នុងផ្ទះជាមួយ។
ប្រភពបានឲ្យដឹងថា ជនសង្ស័យឈ្មោះសាន វឌ្ឍនៈ អាយុ៣២ឆ្នាំ រស់នៅក្នុងភូមិ-ឃុំកើតហេតុខាងលើ។ រីឯក្មេងស្រីរងគ្រោះអាយុ១៣ឆ្នាំ រស់នៅក្នុងភូមិ-ឃុំជាមួយគ្នា ។ម្ដាយក្មេងស្រីឈ្មោះហម សាវី អាយុ៣៧ឆ្នាំ បានប្ដឹងចោទប្រកាន់បុរសនោះ ក្រោយពីសំណុំរឿងនេះបានបែកធ្លាយ។ ម្តាយបញ្ជាក់ថា ករណីនេះបានកើតឡើងតាំងពីវេលាម៉ោង០៨ និង៣០នាទីយប់ថ្ងៃទី០៥ មករា២០១៧ កន្លងមក ប៉ុន្តែនៅរសៀលថ្ងៃទី០៧មករា២០១៧នេះ ទើបម្ដាយក្មេងស្រីដាក់ពាក្យបណ្ដឹង ដោយសារគាត់ជាប់រវល់ធ្វើការនៅព្រំដែន ហើយសមត្ថកិច្ចរបស់លោកក៏បានឃាត់ខ្លួនជនសង្ស័យ ក្រោយពីទទួលបានការស្នើសុំយោបល់ពីលោកស្នងការខេត្ត។
បើតាមចម្លើយក្មេងស្រីរងគ្រោះវិញប្រាប់សមត្ថកិច្ចថា ជននេះបានចាប់នាង នៅពេលនាងកំពុងបិទទ្វារផ្ទះបាយខាងក្រោយ ខណៈជីដូនសំរាន្តក្នុងផ្ទះនៅខាងមុខ ។ នាងប្រាប់ថា ជននេះបានចាប់អូសនាងទៅខាងក្រោយផ្ទះប្រហែល១០០ម៉ែត្រ រួចចាប់ រំលោភនាងរហូតបានសម្រេច បើទោះជានាងឈឺចាប់យ៉ាងណា ក៏ជននេះមិនលើកលែង និងមិនស្ដាប់ការអង្វរ.ករបស់នាងឡើយ ៕
ដោយ៖ ចន្ទ័ឌី-ភិរម្យ
ផ្តល់សិទ្ធិដោយ៖VD7News.com
