ពិតជាសោកស្ដាយខ្លាំងណាស់ ចំពោះអនាគតកុមារកម្សត់ទាំងពីរដែលត្រូវម្ដាយទុកចោល ឲ្យរស់នៅរងទុក្ខវេទនាជាមួយជីដូនចាស់ម្នាក់ជិត២ឆ្នាំ ក្នុងភូមិដាច់ស្រយាលមួយឆ្ងាយពីផ្សារ និងសាលារៀន និងមើលទៅគួរឲ្យសង្វេគខ្លោចផ្សារជាខ្លាំង ហើយទីបំផុតបើទោះជាមានការសន្ដោសពីសប្បុរសជន ព្រះសង្ឃនិងឧកញ៉ា ម៉ុង ឬទ្ធី ដើម្បីសុំពួកគេឲ្យទៅនៅអង្គការមនុស្សធម៌មួយនៅខេត្តបន្ទាយមានជ័យក៏គេគ្មានសំណាងបានទៅដែរ។
ដោយសារជីដូនចាស់របស់ពួកគេមិនព្រមអនុញ្ញាតឲ្យ លោកឧកញ៉ា ម៉ុង ឬទ្ធី នាំយកពួកគេទៅរស់ជាមួយអង្គការមនុស្សធម៌មួយក្នុងក្រុងប៉ោយប៉ែត ដែលស្ថិតក្រោមការគ្រប់គ្រងដោយផ្ទាល់ពីលោក ស្ទីវ ហាយ ជាប្រធានអង្គការនោះដែរ។
នេះបើយោងតាមហ្វេសប៊ុក ព្រះភិក្ខុមួយអង្គ ព្រះនាម Oun Long ដែលបញ្ជាក់ថា ព្រះគុណម្ចាស់បានចុះទៅជួបពួកគេជាលើទី២ កាលពីម្សិលមិញ។
គណនីហ្វេសប៊ុកខាងលើបានសរសេរថាយ៉ាងដូច្នេះថា៖ "ជាលើកទី២ហើយដែលខ្ញុំមកជួបក្មេងកំព្រានៅខេត្តកំពង់ឆ្នាំង ហើយសូមអរគុណណាស់ចំពោះលោក ឧកញ៉ា ម៉ុង ឬទ្ធី ដែលបានផ្តល់ប្រឹក្សាយោបល់និងអង្គការសម្រាប់ជម្រកដល់កុមារទាំងនេះ ។
តែលទ្ធផលចុងក្រោយលោកយាយរបស់កុមារមិនអនុញ្ញាតឱ្យកុមារទៅណាជាដាច់ខាត គាត់មានប្រសាសន៍ថា ពេលនេះមានជំនួយរបស់សប្បុរសជនច្រើនណាស់ ទោះបីខ្ញុំខំពន្យល់ពីបញ្ហាអនាគតរបស់ក្មេងនោះយ៉ាងណាក៏ដោយ ក៏គាត់នៅតែមិនព្រមដដែល។ ថ្ងៃព្រហស្បតិ៍៧រោច ខែបុស្ស ឆ្នាំវកអដ្ឋស័ក ព.ស.២៥៦០ ត្រូវនឹងថ្ងៃទី១៩ ខែមករា ឆ្នាំ២០១៧"។
ជុំវិញការសុំនាំយកកុមារទាំងពីរនៅអង្គការមនុស្សធម៌នោះ មិត្តអ្នកអានខេឃ្យូប ភាគច្រើនប្រហែលជាចង់ឲ្យពួកគេទៅរស់នៅ ដើម្បីឲ្យពួកគេអាចមានអនាគតភ្លឺស្វាងជាងនេះ តើត្រឹមត្រូវទេ? ចុះការបដិសេធន៍ដាច់អហង្ការរបស់ជីដូនខាងលើមិត្តយល់យ៉ាងម៉េចដែរ?
ផ្តល់សិទ្ធិដោយ៖KQUBE
