យន្តហោះចម្បាំងមួយគ្រឿងរបស់កងទ័ព ថៃ បានធ្លាក់នៅក្នុង ហាត់យ៉ៃ (Hat Yai) ខេត្ត សុងក្លា (Songkhla) ក្នុងពេលសម្ដែងការហោះហើរអបអរទិវាកុមារ នៅថ្ងៃសៅរ៍នេះ ។
សារព័ត៌មានក្នុងស្រុកផ្សាយថា អ្នកបើកយន្តហោះបានស្លាប់ក្នុងឧបទ្ទវហេតុនោះ ។ វីដេអូដែលថតដោយអ្នកទស្សនាការសម្ដែងយន្តហោះ បង្ហាញឲ្យឃើញយន្តហោះដែលជួបគ្រោះថ្នាក់ ហោះហើរបង្ហាញជំនាញនៅលើអាកាសប៉ុន្មាននាទីមុនពេលដាំក្បាលចុះយ៉ាងលឿន រួចហើយបុកដីផ្ទុះឆេះចេញជាអណ្ដាតភ្លើងយ៉ាងសន្ធោរសន្ធៅ រួមជាមួយនឹងសំឡេងផ្ទុះដ៏ខ្លាំងលាន់ឮឡើង ធ្វើឲ្យខ្ទ័រទូទាំងអាកាសយានដ្ឋាន។
គ្រោះថ្នាក់នេះ បង្ខំឲ្យអាជ្ញាធរបិទអាកាសយានដ្ឋានទីក្រុង ហាត់យ៉ៃ ព្រមទាំងបង្វែរជើងហោះហើរដឹកអ្នកដំណើរទៅអាកាសយានដ្ឋានផ្សេង ។ លោកនាយករដ្ឋមន្ត្រី ប្រាយុទ្ធ ចាន់អ៊ូចា បានសម្ដែងការរំលែកទុក្ខជាមួយក្រុមគ្រួសាររបស់អ្នកបើកយន្តហោះ ។ កងទ័ពអាកាស បានបង្កើតក្រុមស៊ើបអង្កេតមួយដើម្បីរកមូលហេតុដែលនាំឲ្យយន្តហោះចម្បាំងធ្លាក់ក្នុងពេលសម្ដែង ។
ប្រភពៈ asiancorrespondent
ផ្តល់សិទ្ធិដោយ៖KQUBE
