សិល្បៈ ៖ ហេតុការណ៍ខ្មោចលង រហូតមកដល់ពេលនេះមានអ្នកជឿ និងអ្នកមិនជឿ ប៉ុន្តែរឿងនេះនៅតែកើតមានជារឿយៗ រហូតមានអ្នកជួបប្រទះមួយចំនួនខ្លាចបាក់ស្បាតធ្លាក់ខ្លួនឈឺក៏មានដែរ។ ជាក់ស្ដែងលោក សុន រដ្ឋា អ្នកនិពន្ធ ប្រចាំនៅផលិតកម្ម សាន់ដេ និងផលិតកម្ម សាស្តា ហើយក៏ជាអ្នកនិពន្ធបទចម្រៀងជាច្រើនឲ្យលោក ពេជ្រ ថាណា មានឈ្មោះបោះសំឡេង ក៏បានជួបហេតុការណ៍ខ្មោចលង ពេលដែលលោកកំពុងតែងនិពន្ធបទចម្រៀង " ទន្ទឹងផ្លូវអូន" នៅឯកស្រុកកំពុងត្រាច ខេត្ត កំពត រហូតរាកនោមដាក់ខោ ដោយមិនដឹងខ្លួន។ ជុំវិញរឿងហេតុខាងលើនេះលោក សុន រដ្ឋា បានប្រាប់ Kqube.net កាលពីថ្ងៃម្សិលមិញថា ក្រៅពីអាជីពជាអ្នកតែងនិពន្ធបទចម្រៀងឲ្យផលិតកម្ម សាស្តា និងផលិតកម្ម សាន់ដេ លោកក៏មានការងារជាគ្រូបង្រៀននៅអង្គការ "អង្គការជំនួយជប៉ុនដើម្បីកម្ពុជា" ដែលត្រូវចុះធ្វើការនៅស្រុកកំពង់ត្រាច អស់រយៈពេលជាច្រើនឆ្នាំមកហើយ។
អ្នកនិពន្ធរូបនេះបន្តថា ការនិពន្ធបទចម្រៀងលោកតែងសរសេរនៅពេលយប់ទំនេរពីការងារអង្គការគាប់ជូននៅយប់មួយនោះ តែលោកមិនបានចាំថ្ងៃទីច្បាស់ គឺលោកបានទទួលការងារនិពន្ធបទចម្រៀងឲ្យផលិតកម្ម សាស្តា ចំនួនប្រាំបទ សម្រាប់ឲ្យលោក ពេជ្រ ថាណា ច្រៀង ហើយខាងផលិតកម្មបានប្រាប់ថាសុំឲ្យការងារនេះបានលឿន ដូច្នេះហើយលោកក៏ខិតខំអង្គុយនិពន្ធទាំងយប់តែម្ដង។
លោក សុន រដ្ឋា បន្តថា ពេលនោះខណៈដែលលោកចេញមកបទជើងតូចក្រៅបន្ទប់គេង ស្រាប់តែឃើញសត្វឆ្មាមួយយ៉ាងធំ និងមានជើងតែបី កំពុងសម្លឹងមើលលោក ហើយលោកក៏មើលឆ្មានោះវិញដែរ ស្រាប់តែឆ្មានោះបានហោះទៅលើក៏បានក្លាយទៅជាសត្វស្លាបមួយយ៉ាងធំស្ទើរប៉ុនមនុស្សហើរទៅទុំលើដើមឈើ និងមានភ្លើងថែមទៀត ធ្វើឲ្យលោកភ័យខ្លាច រត់ចូលក្នុងបន្ទប់ដេកវិញរហូតរាកនោមដោយមិនដឹងខ្លួន និងលែងហ៊ានស្នាក់នៅទីនោះថែមទៀត។ អ្នកនិពន្ធរូបនេះបន្តថា ចំពោះហេតុការណ៍នេះលោកមិនដែលជួបប្រទះទេ ហើយបើតាមការសន្និដ្ឋានរបស់លោក គឺប្រហែលជាខ្មោចលង ព្រោះពេលលោកសួរនាំអ្នកភូមិពីទីតាំងខាងលើ ក៏មានអ្នកភូមិជាច្រើនត្រូវខ្មោចលង រហូតមានអ្នកខ្លះឈឺជ្រុះសក់ក៏មានដែរ៕
ផ្តល់សិទ្ធិដោយ KQUBE
