√ នារីមានសង្សារ ប្រសិនបានស្តាប់សម្តី សុខ ពិសី ផ្តាំផ្ញើថ្ងៃ១៤ កុម្ភៈ ប្រហែលជាមិនស្តាយក្រោយ

សិល្បៈ ៖ ថ្ងៃបុណ្យនៃសេចក្ដី ស្រឡាញ់យុវវ័យភាគច្រើនតែងយល់ថា ជាថ្ងៃពិសេសសម្រាប់ដៃគូស្នេហាហើយការយល់ឃើញបែបនេះមានមហាជនជាច្រើន តែងផ្ដាំផ្ញើយុវវ័យគួរកុំធ្វើអ្វីប្រាស់ចាកប្រពៃណី។ យ៉ាងណាមិញកំពូលតារាច្រៀង សាន់ដេ សុខ ពិសី ក៏បានប្រាប់ថា សូមយុវតីគ្រប់កុំគិតថា ថ្ងៃនេះជាថ្ងៃដែលត្រូវលះបង់ខ្លួនប្រាណទៅឲ្យគូស្នេហ៍ និងកុំចាញ់បោកការលួងលោមរបស់សង្សារ ហើយត្រូវចងចាំថា ស្នេហាពិតយើងត្រូវផ្ដល់តម្លៃឲ្យគ្នា និងចូលដល់ចាស់ទុំ។

សុខ ពិសី បន្តថា ថ្ងៃ១៤ កុម្ភៈ មិនមែនសំដៅទៅលើពាក្យថា បុណ្យសង្សារទេ គឺបុណ្យសេចក្តី ស្រឡាញ់ ហើយការស្រឡាញ់ក៏មិនមែនសំដៅទៅលើតែគូស្នេហ៍ដែរ គឺមានទាំងមិត្តភ័ក្ដិ បងប្អូន ម៉ាក់ប៉ា យាយតា និងអ្នកនៅជុំវិញខ្លួនទាំងអស់ ដូច្នេះហើយសូមយុវវ័យគ្រប់រូបកុំយល់ច្រឡំថា ថ្ងៃនេះជាថ្ងៃសំខាន់សម្រាប់តែគូស្នេហ៍។

តារារូបនេះបន្តថា ក្នុងនាមជាយុវវ័យយើងមិនត្រូវបណ្ដោយខ្លួនដើរលើផ្លូវខុសប្រពៃណី តាមការលួងលោមពីគូស្នេហ៍ឡើយ ព្រោះភាពបរិសុទ្ធសំខាន់ណាស់សម្រាប់នារីគ្រប់រូប។ កញ្ញាបញ្ជាក់ទៀតថា ការស្រឡាញ់ពិត គឺមិនមែនជាការលួងលោម ឬជាការលះបង់ភាពបរិសុទ្ធរបស់ខ្លួនជូនទៅសង្សារទេ គឺស្នេហាពិតជាការស្រឡាញ់ផ្ដល់តម្លៃ គោរពសិទ្ធគ្នា ត្រូវចូលស្គីដណ្ដឹងដល់ចាស់ទុំតាមប្រពៃណីទើបគេហៅថា ស្នេហាស្មោះ៕