ទិវានៃក្តីស្រឡាញ់ឬត្រូវបានមិត្តយុវវ័យមួយចំនួនបានហៅថាបុណ្យសង្សារនោះ កាន់តែកៀកនឹងចូលមកដល់ហើយ។ បើតាមនៅថ្ងៃ ១៤ កុម្ភៈ ២០១៧នេះ ត្រូវបានអ្នកស្រាវជ្រាវសុខភាពសាធារណៈមើលឃើញថា ទំនោរនៃការរួមភេទរបស់យុវវ័យមានការកើនឡើងវិញ។
ទំនោរនៃរួមភេទរបស់យុវវ័យដែលនឹងកើនវិញនេះ ត្រូវបានលោក តុង សុប្រាជ្ញ អ្នកស្រាវជ្រាវសុខភាពសាធារណៈផ្ដោតលើសុខភាពផ្លូវភេទរបស់យុវវ័យបានថ្លែងក្នុងបទសម្ភាសជាមួយ BTV កាលពីពេលថ្មីនេះថា ដោយសារអាជ្ញាធរបានទម្លាក់ដៃក្នុងការទប់ស្កាត់នូវជំងឺចាស់ នៅរយៈពេលប៉ុន្មានឆ្នាំចុងក្រោយនេះ។
ម្យ៉ាងទៀតនោះគឺមិត្តយុវវ័យ ពិសេសបុរសៗតែម្តង គាត់បានប្រើលេសមួយចំនួននៅថ្ងៃ១៤ កុម្ភៈ ដើម្បីលួងលោមមិត្តស្រីខ្លួនឲ្យរួមភេទ។ អ្នកស្រាវជ្រាវដែលត្រូវបានគេដាក់ងារថា ថៅកែវ៉ាឡិនថាញ បានបញ្ជាក់ពីលេសទាំងនោះថា បើសិនជាមិត្តស្រីពួកគាត់មិនព្រមរួមដំណេកជាមួយខ្លួនទេ គេនឹងប្រើវិធីដូចជា៖
ទីមួយ៖ គេនឹងអូសក្រឡានាំទៅញ៉ាំអាហារពីកន្លែងមួយទៅកន្លែង ហើយបន្តចូលខារ៉ាអូខេ (KTV) រហូតដល់យប់ជ្រៅ រួចប្រើលេសថា យប់ហើយ មិនអាចចូលផ្ទះបានទេ ព្រោះអាចប៉ាម៉ាក់ស្តីឲ្យ ដូច្នេះគេងនៅខាងក្រៅសិនហើយ ចាំស្អែកព្រឹកចាំទៅ។
ទីពីរ៖ ទិញរបស់របរប្រើប្រាស់ ឬ កាដូថ្លៃៗ ជូនមិត្តស្រី ដើម្បីធ្វើឲ្យដៃគូសង្សារខ្លួនមានអារម្មណ៍រំភើបចិត្ត។
និងទីបី៖ គឺប្រើលេសថា បើដៃគូស្នេហាមិនព្រមរួមភេទជាមួយខ្លួន បញ្ជាក់ថា ភាគីខាងស្រីមិនខ្លួនស្រឡាញ់ពិតប្រាកដ ឬមិនទុកចិត្តគ្នាទៅវិញថាស្នេហាគេពិតជាស្មោះស្ម័គ្រ។ សម្រាប់ចំណុចទាំងនេះ ត្រូវបានថៅកែវ៉ានឡិនថាញរូបនេះអះអាងថា វាត្រូវមិត្តយុវវ័យមួយចំនួន ពិសេសបុរសតែម្តង តែងប្រើប្រាស់អូសទាញដល់មិត្តស្រីឲ្យរួមភេទ។
យ៉ាងណាមិញវានៅមិនទាន់អស់នៅឡើយទេ គឺពួកគេអាចនឹងប្រើមធ្យោបាយជាច្រើនទៀត ដើម្បីអូសទាញ ដូច្នេះសូមមិត្តអ្នកអានទាំងអស់មេត្តា សូមគិតគូឲ្យគ្រប់ជ្រុងជ្រោយមុន មិនធ្វើអ្វីមួយ ជាពិសេសមុននឹងប្រឡូកក្នុងរឿងផ្លូវភេទ៕
ផ្តល់សិទ្ធិដោយ៖KQUBE
