√ យុវជនមួយក្រុម បង្កើតមូលនិធិជួយសាលាក្រីក្រតាមទីជនបទ

ខេត្តកែប៖ យុវជនមួយក្រុមមានសមាជិកប្រមាណ៣២នាក់ បានមូលមតិរួម បង្កើតមូលនិធិមួយ ដែលមានឈ្មោះថា មួយថ្ងៃ១០០០រៀល ដើម្បីយកថវិកាដែលសន្សំបានទាំងនោះទៅជួយបណ្ដាសាលារៀនណា ដែលខ្វះខាតនៅតាមទីជនបទ។ ទោះបីជាមូលនិធិនេះទើបតែបង្កើតឡើងថ្មោងថ្មីក៏ពិតមែន តែសមាជិកក្រុមមានឆន្ទៈក្នុងការជួយសង្គមតាមរយៈការចែករំលែក។

តួយ៉ាងកាលពីពេលថ្មីៗនេះ មូលនិធិបានទិញសម្ភារៈសិក្សាមួយចំនួន និងថវិកាដែលខំសន្សំបានតិចតួច ទៅចែកជួនលោកគ្រូ អ្នកគ្រូ និងក្មេងៗដែលជាសិស្សសាលាប្រមាណជាង១០០នាក់ សរុបថវិកាអស់ជាង១លានរៀល ទៅជួយសាលាបឋមសិក្សា តាពីង ដែលស្ថិតនៅចុងកាត់មាត់ញក មានទីតាំងនៅភូមិតាពីង ឃុំអង្កោល ស្រុកដំណាក់ចង្អើរ ខេត្តកែប។

ប្រាប់អ្នកសារព័ត៌មាន របស់គេហទំព័រ ខេឃ្យូប តាមរយៈបណ្ដាញសង្គមហ្វេសប៊ុក យុវជនភឿន បូអ៊ី ដែលជាអតីតសិស្សរៀននៅសាលានេះផ្ទាល់ ហើយជាសមាជិកមួយរូបរបស់មូលនិធិខាងលើ បានអោយដឹងថា ការដែលផ្តើមបង្កើតមូលនិធិនេះឡើង គឺដើម្បីចូលរួមជួយសង្គមតាមរយៈមូលនិធិមួយខាងលើ ក៏ដូចជាជួយអោយសិស្សានុសិស្សមានសម្ភារៈសិក្សា និងជួយជនខ្វះខាត រួមទាំងជនទុរគតផងដែរ។ យុវជនរូបនេះបន្តថា នេះជាសកម្មភាពមនុស្សធម៌លើកទី១របស់ក្រុមខ្លួន បើតាមគម្រោងនិងមានជាបន្តទៀត តែរងចាំប្រាក់សន្សំរបស់ក្រុមខ្លួនបានគ្រាន់បើជាងនេះសិន។

គួរបញ្ជាក់ថា ការដែលក្រុមមូលនិធិខាងលើ ជ្រើសយកសាលាបឋមសិក្សាតាពីង សម្រាប់ដំណើរការគម្រោងរបស់ខ្លួននេះ ក៏ព្រោះតែពួកគេយល់ឃើញថា សាលាកំពុងខ្វះខាតច្រើនទៅលើសម្ភារៈសិក្សា ជាពិសេសគឺបណ្ណាល័យតែម្តង។ ជាសាលាមួយដែលហ៊ុមព័ទ្ធដោយទឹកប្រៃ យោងតាមអ្នកគ្រូម្នាក់ ដែលបង្រៀននៅទីនោះធ្លាប់ប្រាប់ អ្នកសារព័ត៌មានយើងថា សព្វថ្ងៃសាលា មិនមានបណ្ណាល័យនោះទេ ហើយសៀវភៅរឿងនិទានខ្លីៗ មានមិនដល់១០ក្បាលផង ដោយសៀវភៅទាំងនោះគឺ នាយកខ្ចីពីសាលាគេដទៃទៀត។

សាលាធ្លាប់បានស្នើទៅមន្ទីរអប់រំខេត្តដែរ តែមិនទាន់ទទួលបានចម្លើយ។ ដោយឡែកអាគារសិក្សា គឺសាលាទើបទទួលការជួយពីជនបរទេសមួយក្រុម ដែលបានសាងសង់ឲ្យ ហើយទើបតែអាចប្រើប្រាស់បានប្រហែលជាងមួយឆ្នាំប៉ុណ្ណោះ៕