រាជធានីភ្នំពេញ ៖ កម្លាំងសមត្ថកិច្ចជំនាញ នៃការិយាល័យបង្ក្រាបបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនខ្លួនជនសង្ស័យម្នាក់ទៅតុលាការ កាលពីរសៀលថ្ងៃទី១៥ ខែកុម្ភៈ ឆ្នាំ២០១៧ ម្សិលមិញនេះ ពាក់ព័ន្ធករណី ឆបោក តាមរយៈការលក់សំបុត្រ យន្តហោះក្លែងក្លាយ ទៅឲ្យអតិថិជនរាប់រយអ្នក។
ជនសង្ស័យឈ្មោះ រស់ សុភីរ័ត្ន ហៅស្រី រ័ត្ន ជាម្ចាស់ក្រុមហ៊ុន ស្រី រ័ត្ន អន្តរជាតិទេសចរណ៍ ដែលមានពីរទីតាំង ទីតាំងទី១ ស្ថិតនៅអគារលេខ៦២-៦៤E០ ផ្លូវមុនីវង្ស សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។ ទីតាំងទី២ ស្ថិតនៅផ្ទះលេខ១១៧E0 ផ្លូវកម្ពុជាក្រោម សង្កាត់មិត្តភាព ខណ្ឌ៧មករា រាជធានីភ្នំពេញ បានបើកដំណើរការជាយូរឆ្នាំមកហើយ តែនៅក្នុងអំឡុងឆ្នាំ២០១៦-២០១៧ ក្រុមហ៊ុនរបស់ខ្លួនបានជួបបញ្ហា ដោយបុគ្គលិកលួចលក់សំបុត្រយន្តហោះក្លែងក្លាយ ដល់អតិថិជន ហើយសំបុត្រយន្តហោះនោះ ធ្វើដំណើរមិនបាន អតិថិជនក៏មកទាមទារយកប្រាក់វិញ ។
ក្នុងនោះអតិថិជនខ្លះបានដោះស្រាយរួចហើយ និងខ្លះទៀតមិនទាន់បានដោះស្រាយ ទើបនៅថ្ងៃទី១៣ ខែកុម្ភៈ ឆ្នាំ២០១៧ នៅវេលាម៉ោង២០:៣០នាទីយប់ រូបខ្លួនក៏ត្រូវបានសមត្ថកិច្ចអាវុធហត្ថឃាត់តែម្តង ។ គួរបញ្ជាក់ថា ជនរងគ្រោះ ដែលរងនៅអំពើរបោកប្រាស់នេះ មានរហូតដល់ ៩២នាក់ ដែលខាតបង់ប្រាក់សរុបចំនួន ២៤,៧៩២៣ ដុល្លា។
បើទោះបីជាជនសង្ស័យ ពុំព្រមសារភាពថា អំពើរបោកប្រាស់នេះ ជាទង្វើររបស់ខ្លួនក៏ដោយ ក៏សមត្ថកិច្ចអាវុធហត្ថរាជធានីភ្នំពេញ នៅតែមិនឲ្យជនសង្ស័យគេចផុតពីសំណាញ់ច្បាប់បានដែល ។ ក្រោយពេលជនសង្ស័យបញ្ជូនដល់តុលាការប្រជាពលរដ្ឋរាប់សិបអ្នក បានតាមទៅមើលដល់តុលាការ និងសំដែងការសាទរយ៉ាងខ្លាំងចំពោះចំណាត់ការ របស់អាវុធហត្ថរាជធានីភ្នំពេញ៕ ដោយ កូននាគខ្មៅ
ផ្តល់សិទ្ធិដោយ៖VD7News
