លោក គីម ជុងណាម ដែលជាបងប្រុសម្ដាយផ្សេងគ្នាជាមួយមេដឹកនាំ កូរ៉េខាងជើង គីម ជុងអ៊ុន ត្រូវបានគេដាក់ថ្នាំបំពុលសម្លាប់ក្នុងអាកាសយានដ្ឋានទីក្រុង កូឡាឡាំពួរ ប្រទេស ម៉ាឡេស៊ី ហើយប៉ូលិសបញ្ជាក់ថា ធ្វើឡើងដោយស្ត្រីជនជាតិ កូរ៉េខាងជើង ពីរនាក់ ដែលពេលនេះបានរត់គេចខ្លួន ។
ក្រោយត្រូវថ្នាំបំពុល មានមនុស្សនាំយកលោក គីម ទៅមន្ទីរពេទ្យប៉ុន្តែលោក គីម បានស្លាប់នៅតាមផ្លូវទៅកាន់មន្ទីរពេទ្យ ។ គីម ជុងណាម គឺជាកូនប្រុសច្បងបង្អស់របស់លោក គីម ជុងអ៊ីល ប៉ុន្តែម្ដាយរបស់លោក គីម ជុងណាម គឺជាភរិយាក្រៅផ្លូវការ ដែលមិនអាចឲ្យគ្រួសាររបស់លោក បន្តដំណែងពីឪពុក ។
ម្ដាយរបស់លោក គីម ជុងណាម គឺជាតារាភាពយន្តជនជាតិ កូរ៉េខាងត្បូង ស៊ុង ហេ-រីម ប៉ុន្តែអ្នកស្រី ស៊ុង បានស្លាប់ក្នុងប្រទេស រុស្ស៊ី ចំណែកលោក គីម ជុងណាម ត្រូវបានគេស្គាល់ថា ជាមនុស្សប្រឆាំងនឹងមេដឹកនាំកូរ៉េខាងជើងបច្ចុប្បន្ន ព្រមទាំងរិះគន់ការកាន់ដំណែងតវង់ត្រកូលក្នុងប្រទេស កូរ៉េខាងជើង និងជាអ្នកគាំទ្រឲ្យមានកំណែទម្រង់នៅក្នុងប្រទេស ។
សារព័ត៌មាន កូរ៉េខាងត្បូង ចុះផ្សាយថា លោក គីម ជុងណាម គឺជាគោលដៅនៃការធ្វើឃាត ក្រោយពីប៉ូលិស កូរ៉េខាងត្បូង ចាប់បានជនបង្កប់ម្នាក់ ហើយសួរចម្លើយរកឃើញថា ជននោះទទួលផែនការធ្វើឃាតលោក គីម ជុងណាម ដោយបើករថយន្តបំបុកក្នុងប្រទេស ចិន ក្នុងឆ្នាំ ២០១០ ។ កាលពីឆ្នាំមុន ប្រទេស កូរ៉េខាងត្បូង បានព្រមានអំពីផែនការធ្វើឃាតទៅលើមនុស្សជាច្រើននៅលើទឹកដី កូរ៉េខាងត្បូង រៀបចំដោយប្រទេស កូរ៉េខាងជើង ។
ប្រភពៈ channelnewsasia
ផ្តល់សិទ្ធិដោយ៖KQUBE
