ក្រុមអាល់កៃដាបានចេញសេចក្ដីរាយការណ៍ដកស្រង់ពីសារព័ត៌មាន អីុស្រាអែល ដែលចុះផ្សាយថា ទាហាន អាមេរិក ៨ នាក់ស្លាប់នៅក្នុងប្រតិបត្តិការវាយឆ្មក់មិនបានសម្រេចមួយកាលពីសប្ដាហ៍មុន ហើយជាប់អន្ទាក់ក្នុងមូលដ្ឋានក្រុមអាល់កៃដានៅ យ៉េមែន ។
នេះគឺជាបញ្ជាប្រតិបត្តិការវាយឆ្មក់ដំបូងរបស់លោក ដូណាល់ ត្រាំ ចាប់តាំងពីឡើងកាន់តំណែងជាប្រធានាធិបតី ប៉ុន្តែសេតវិមានបញ្ជាក់ថាទាហាន អាមេរិក ស្លាប់តែម្នាក់ប៉ុណ្ណោះ ។ ក្នុងពេលជាប់អន្ទាក់ ទាហានពិសេស បានស្នើជំនួយពីឧទ្ធម្ភាគចក្រជាច្រើនគ្រឿងរបស់ទាហានម៉ារីន និងស្នើជំនួយពីយន្តហោះចម្បាំង Harrier jump ជាច្រើនគ្រឿង រហូតដល់ស្នើយន្តហោះ MV-22 Osprey ពីរគ្រឿង ដើម្បីជួយរំដោះកម្លាំងចេញពីអន្ទាក់ ។
ចំណែកទាហាន អាមេរិក បញ្ជាក់ថា ប្រតិបត្តិការនោះធ្វើឡើងទាំងគ្មានព័ត៌មានសម្ងាត់គ្រប់គ្រាន់ គ្មានការគាំទ្រនៅលើដីគ្រប់គ្រាន់ និងគ្មានសម្ភារគ្រប់គ្រាន់ ធ្វើឲ្យទាហានពិសេស អាមេរិក ជាប់អន្ទាក់នៅកណ្ដាលចម្ការមីន និងឡោមព័ទ្ធដោយអ្នកប្រយុទ្ធអាល់កៃដា ព្រមទាំងជាកន្លែងដែលមានអ្នកបាញ់កាំភ្លើងស៊ីបគ្រប់ទិសទី ។
មន្ទីរបញ្ចកោណឲ្យដឹងថា ឧទ្ធម្ភាគចក្រមួយគ្រឿងរបស់ទាហាន អាមេរិក ត្រូវបានក្រុមអាល់កៃដាបាញ់ធ្លាក់ ប៉ុន្តែមិនបានផ្ទុះឆេះឡើយ ដោយទាហានម៉ារីនពីរនាក់រងរបួស និងសម្រេចចិត្តបំផ្លាញឧទ្ធម្ភាគចក្រចោលដើម្បីកុំឲ្យធ្លាក់ទៅក្នុងដៃក្រុមអាល់កៃដា ។ សេតវិមានរាយការណ៍ថា ទោះជាប្រតិបត្តិការបរាជ័យ ប៉ុន្តែទាហាន អាមេរិក ទទួលបានព័ត៌មានច្រើនពីប្រតិបត្តិការនោះ និងបានសម្លាប់ជីវពល ១៤ នាក់ ។ ប្រភពៈ middleeastmonitor, telegraph
ផ្តល់សិទ្ធិដោយ៖KQUBE
