រាជធានីភ្នំពេញ ៖ ហេតុការណ៍នេះកើតឡើងកាលពីវេលាម៉ោង១០ និង៣០នាទីយប់ ថ្ងៃទី៧ ខែកុម្ភៈ ឆ្នាំ២០១៧ នៅមុខសាលាបឋមសិក្សាអូដឹម ស្ថិតក្នុងភូមិអូដឹម សង្កាត់ចោមចៅ ខណ្ឌពោធិ៍សែនជ័យ ។ នារីរងគ្រោះឈ្មោះ ធារី ហៅ កាំឡៃ អាយុ១៧ឆ្នាំ រស់នៅភូមិកណ្តាល ឃុំវត្តអង្គខាងត្បូង ស្រុកបន្ទាយមាស ខេត្តកំពត ។
មុនពេលកើតហេតុគេឃើញ នារីខាងលើដើរ នៅតាមបណ្តោយផ្លូវជាតិលេខ៤លុះពេលដើរមកដល់មុខ សាលាបឋមសិក្សាអូដឹម នារីវ័យក្មេងរូបនោះ ដើរឆ្លងកាត់ផ្លូវទៅវិញទៅមក មើលទៅហាក់ដូចជាចង់ដើរ ឲ្យរថយន្តបុកស្លាប់អ៊ីចឹង ឃើញដូច្នេះប្រជាពលរដ្ឋក៏រាយការណ៍ ទៅសមត្ថកិច្ចឲ្យមកអន្តរាគមន៍ និងធ្វើការសួរនាំ ។
ពេលដែលសមត្ថកិច្ចទៅដល់ ហើយបាននាំនារីរូបនោះទៅសួរនាំនៅប៉ុស្តិ៍នគរបាលចោមចៅបានតែបន្តិច ដោយនាងនិយាយប្រាប់ថា នាងត្រូវឪពុកចុង ដេញចេញពីផ្ទះ ពីខេត្តកំពត ទើបនាងជិះរថយន្តឈ្នួលមកភ្នំពេញ ពេលមកដល់ភ្នំពេញមិនដឹងទៅណាមកណាទេ ចេះតែដើរទាំងអត់បានហូបបាយទឹករយៈពេល២ថ្ងៃមកហើយ ។ គ្រាន់តែសមត្ថកិច្ចឮថាអត់បានហូបបាយ រៀបចំទៅទិញបាយយកមកឲ្យហូប តែមិនទាន់បានទៅទិញផង ស្រាប់តែនារីវ័យក្មេងរូបនោះដួលសន្លប់ស្តូកស្តឹងតែម្តង ។ ភ្លាមៗនោះសមត្ថកិច្ចបានបញ្ជូននារីរងគ្រោះទៅព្យាបាលនៅសម្ភពចោមចៅ ក្រោយពេលដឹងខ្លួនហើយត្រូវបានខាងវិទ្យុដឹកនាងយកទៅមណ្ឌលបាត់ទៅ ៕ ដោយ ហង្ស សុភាព
ផ្តល់សិទ្ធិដោយ៖VD7News.com
