ជាការពិត បើមិនស្នើសុំប្រាកដជាមិនបាន ប៉ុន្តែបើស្នើអាចបាន អាចអត់ ។ ក្មេងស្រីអាយុ ៧ ឆ្មាំជនជាតិ អង់គ្លេស ឈ្មោះ Chloe Bridgewater រស់នៅក្នុងទីក្រុង Hereford ចក្រភពអង់គ្លេស បានសរសេរសំបុត្រមួយច្បាប់ផ្ញើទៅក្រុមហ៊ុន Google ដើម្បីសុំការងារធ្វើ ។
Chloe បានបញ្ជាក់នៅក្នុងសំបុត្រនោះអំពីលក្ខណសម្បត្តិរបស់នាង (ខ្ញុំចូលចិត្តកុំព្យូទ័រ) ព្រមទាំងអះអាងថា នាងជាមនុស្សដែលសមស្របជាមួយនឹងក្រុមហ៊ុន Google ដោយមានអំណះអំណាងជាច្រើនៈ គ្រូបង្រៀនរបស់ខ្ញុំនិយាយប្រាប់ឪពុកម្ដាយខ្ញុំថាខ្ញុំជាសិស្សរៀនពូកែបំផុតក្នុងថ្នាក់ ទាំងការប្រកបអក្សរ ការអានអក្ស និងការងារផ្សេងៗគឺល្អទាំងអស់ ។ Chloe សរសេរថា នេះមិនត្រឹមតែជាពាក្យសុំធ្វើការដំបូងប៉ុណ្ណោះទេ ថែមទាំងជាលិខិតដំបូង ក្រៅពីពាក្យជូនពរដែលបានសរសេរផ្ញើទៅអ្នកដទៃក្នុងថ្ងៃបុណ្យ Christmas ។
នាយកប្រតិបត្តិរបស់ក្រុមហ៊ុន Google លោក Sundar Pichai បានឃើញសំបុត្រ Chloe ដោយផ្ទាល់ ហើយឆ្លើយតបវិញថាៈ ខ្ញុំជឿថា ប្រសិនបើក្មួយស្រីបន្តប្រឹងប្រែង និងព្យាយាមសម្រេចឲ្យបានតាមសុបិន ក្មួយនឹងអាចសម្រេចបាននូវអ្វីដែលក្មួយកំណត់ក្នុងចិត្តខ្លួនឯង គឺចាប់តាំងពីធ្វើការនៅក្រុមហ៊ុន Google រហូតដល់អាចចូលរួមប្រកួតក្នុងវិញ្ញាសាហែលទឹកនៅ អូឡាំពិច ។
“ខ្ញុំទន្ទឹងរង់ចាំពាក្យសុំចូលធ្វើការរបស់ក្មួយ នៅពេលណាដែលក្មួយបញ្ចប់ការសិក្សា” ។ ចំណែកអ្នកនាំពាក្យក្រុមហ៊ុន Google និយាយប្រាប់ស្ថានីយទូរទស្សន៍ CNBC នៅ អាមេរិក ថា លិខិតនោះ គឺជាការព្រមព្រៀងគ្នាជាក់លាក់មួយ រវាងនាយកប្រតិបត្តិក្រុមហ៊ុន Google និង Chloe ។ ប្រភពៈ CNBC
ផ្តល់សិទ្ធិដោយ៖KQUBE
