ថ្ងៃថ្ងៃព្រហស្បតិ៍នេះ រដ្ឋមន្ត្រីការពារជាតិ សហរដ្ឋអាមេរិក លោក Jim Mattis បានធ្វើទស្សនកិច្ចទៅកាន់មូលដ្ឋានកងទ័ពអាកាស កូរ៉េខាងត្បូង ក្នុងទីក្រុង សេអ៊ូល ជាកន្លែងដែលលោកបានប្ដេជ្ញាគាំទ្រ កូរ៉េខាងត្បូង ក្នុងកិច្ចប្រឹងប្រែងទប់ទល់ចំពោះការគំរាមនុយក្លេអ៊ែរ និងមីស៊ីល កូរ៉េខាងជើង ក្នុងនោះមានផែនការដាក់ពង្រាយប្រព័ន្ធការពារមីស៊ីលនៅលើទឹកដី កូរ៉េខាងត្បូង ជាដើម ។
ទស្សនកិច្ចរបស់លោក Jim Mattis ធ្វើឡើងដំណាលពេលដែលប្រទេស កូរ៉េខាងជើង អះអាងថាកងទ័ពរបស់ខ្លួនត្រៀមខ្លួនរួចជាស្រេចដើម្បីសាកល្បងមីស៊ីលឆ្លងទ្វីបថ្មីមួយទៀត ជាអ្វីដែលអាចជាការប្រឈមទីមួយរបស់រដ្ឋបាលលោក ដូណាល់ ត្រាំ ។
ប្រទេស កូរ៉េខាងត្បូងនិង សហរដ្ឋអាមេរិក បញ្ជាក់ថា ការដាក់ពង្រាយប្រព័ន្ធការពារមីស៊ីល បំណងដើម្បីទប់ទល់នឹងសមត្ថភាពនុយក្លេអ៊ែរ កូរ៉េខាងជើង ព្រមទាំងអំណាចមីស៊ីលរបស់ប្រទេសនេះ ដែលកើនឡើងកាន់តែខ្លាំង ទោះជាសហគមន៍អន្តរជាតិព្យាយាមទប់ស្កាត់សកម្មភាពអភិវឌ្ឍអាវុធរបស់ទីក្រុង ព្យុងយ៉ាង យ៉ាងណាក៏ដោយ ។
រដ្ឋមន្ត្រីការពារជាតិ អាមេរិក ទំនងជាមានបំណងបង្ហាញដល់សម្ព័ន្ធមិត្តទ្វីបអាស៊ីរបស់ខ្លួនខ្លួននូវការគាំទ្រ និងការពារ ក្រោយពីមានមន្ទិលសង្ស័យក្នុងទីក្រុង សេអ៊ូល និង ទីក្រុង តូក្យូ ដោយសារការសន្យារបស់លោក ដូណាល់ ត្រាំ អំឡុងយុទ្ធនាការឃោសនាបោះឆ្នោតថា កូរ៉េខាងត្បូង និង ជប៉ុន គួរចំណាយដើម្បីការពារខ្លួនឯង ដោយមិនត្រូវពឹងផ្អែកលើ អាមេរិក ដើម្បីការពារឡើយ ។ លោក Jim Mattis នឹងបន្តទស្សនកិច្ចទៅកាន់ប្រទេស ជប៉ុន ព្រមទាំងជួបសមភាគី ជប៉ុន ក្នុងទីក្រុង តូក្យូ ។
ផ្តល់សិទ្ធិដោយ៖KQUBE
