លោក Avigdor Lieberman រដ្ឋមន្ត្រីការពារជាតិអុីស្រាអែលព្រមានជាសាធារណថា ទ័ពអាកាសខ្លួននឹងបាញ់កម្ទេចប្រព័ន្ធការពារដែនអាកាសរបស់ស៊ីរីភ្លាមៗ ប្រសិនបើកម្លាំងប្រតិបត្តិការស៊ីរីនៅតែបន្តបាញ់មីស៊ីលតម្រង់មករកយន្តហោះចម្បាំងអុីស្រាអែល។
នេះបើតាមការចុះផ្សាយដោយសារព័ត៌មាន RT នៅរសៀលថ្ងៃចន្ទ ទី២០ ខែមីនា ឆ្នាំ២០១៧។ លោក Avigdor Lieberman បានព្រមានថា "លើកក្រោយ ប្រសិនបើស៊ីរីប្រើប្រាស់ប្រព័ន្ធការពារដែនអាកាសរបស់ខ្លួន ប្រឆាំងនឹងយន្តហោះចម្បាំងរបស់យើងទៀង យើងនឹងបាញ់បំផ្លាញប្រព័ន្ធការពារដែនអាកាសរបស់ពួកគេវិញភ្លាម! លើសពីនេះទៀតដរាបណាស៊ីរីនៅតែបន្តបញ្ជូនអាវុធឱ្យក្រុមឧទ្ទាមហេសប៊ូលឡា ខ្ញុំសូមបញ្ជាក់ថា អុីស្រាអែលមិនចង់លូកដៃចូលក្នុងសង្រ្គាមស៊ីរី ឬក៏ប្រឈមមុខនឹងរុស្ស៊ី នោះឡើយ ក៏ប៉ុន្តែសន្តិសុខអុីស្រាអែល គឺជាអាទិភាពមុនគេបង្អស់"។
គួរបញ្ជាក់ផងដែរថា ស្ថានភាពតានតឹងរវាងអុីស្រាអែល និងស៊ីរីបច្ចុប្បន្នកំពុងឈានទៅរកការប្រកាសសង្គ្រាមដោយមិនស្ទាក់ស្ទើរ ខណៈដែលលោកនាយករដ្ឋមន្ត្រី Avigdor Lieberman ចាត់ទុកថា ស៊ីរីគឺមេរករឿង និងជាសត្រូវលេខ១របស់ខ្លួន៕
ផ្ដល់សិទ្ធិដោយ៖KQUBE
