ខេត្តកំពង់ឆ្នាំង៖ ជនសង្ស័យជាចោរម្នាក់រត់ប្រផុតប្រផើយ ដោយសារកម្លាំងសមត្ថកិច្ចជាច្រើនបានឡោមព័ទ្ធចាប់កាលពីព្រឹក ថ្ងៃទី២៩ មិនា ២០១៧ នៅចំណុចភូមិសំរោងសែង ឃុំសំរោងសែន ស្រុកកំពង់លែង ខេត្តកំពង់ឆ្នាំង ចាប់បានខណៈជននេះរត់ទៅលាក់ខ្លួនក្នុងទឹកស្រះមួយកន្លែង។
យោងតាមសមត្ថកិច្ចដែលផ្ដល់ព័ត៌មានថា ជនសង្ស័យ ឈ្មោះ យ៉ន ឌី ហៅយ៉ន ម៉េងហៀង ភេទប្រុស អាយុ២១ឆ្នាំ ស្នាក់នៅជាមួយបងស្រី ភូមិត្រពាំងចិក្សា សង្កាត់កំពង់ឆ្នាំង។ ចំណែកស្ត្រីរងគ្រោះម្ចាស់ម៉ូតូឈ្មោះ យ៉ា យ៉ុន អាយុ៣៦ឆ្នាំ ជាកម្មការិនីរោងចក្រ នៅភូមិត្រពាំចិក្សា។ ជនសង្ស័យបានធ្វើសកម្មភាពគាស់ទ្វាបន្ទប់ជនរងគ្រោះ ហើយក៏លួចកាច់សោរក យកម៉ូតូមួយគ្រឿង ម៉ាក ទ្រីម C125 ពាក់ស្លាកលេខ កំពង់ឆ្នាំង 1F-3028 យកទៅបាត់ លុះពេលជនរងគ្រោះមកវិញ ទើបដឹងថាបាត់ម៉ូតូ ក៏ប្តឹងសមត្ថកិច្ច។
សមត្ថកិច្ចបានកំណត់មុខសញ្ញាឈានទៅដល់ការដេញចាប់ឃាត់បុរសខាងលើបានតែម្ដង។ បច្ចុប្បន្នជនសង្ស័យ ត្រូវបានសមត្ថកិច្ចចាប់ខ្លួន និងកសាងសំណុំរឿងបញ្ជូនទៅតុលាកា ចាត់ការតាមនិតិវិធី៕ ដោយ៖ (មុត សុធី)
ផ្ដល់សិទ្ធិដោយ៖VD7News
