បុរសជនជាតិ កូឡុំប៊ី ម្នាក់ ឈ្មោះ រ៉ាហ្វាអែល អ៊ូរីបេ (Rafael Uribe) អាយុ ៣៨ ឆ្នាំ ត្រូវបានតុលាការទីក្រុង បូគូតា (Bogotá) កាត់ទោសឲ្យជាប់ពន្ធនាគារ ៥១ ឆ្នាំ និងបង់ប្រាក់ ២៥៦០០ ដុល្លារអាមេរិក ពីបទរំលោភផ្លូវភេទ និងសម្លាប់ក្មេងស្រីអាយុ ៧ ឆ្នាំ ដែលជាឧក្រិដ្ឋកម្មធ្វើឲ្យរន្ធត់ទូទាំងប្រទេស កូឡុំប៊ី ។
រដ្ឋអាជ្ញា កូឡុំប៊ី និយាយថា តាមច្បាប់ឧក្រិដ្ឋជន អ៊ូរីបេ ត្រូវជាប់ពន្ធនាគារ ៦០ ឆ្នាំ ប៉ុន្តែដោយសារអ៊ូរីបេ មិនធ្លាប់មានប្រវត្តិប្រព្រឹត្តបទល្មើសកន្លងមក ដូច្នេះតុលាការបានសម្រាលទោសមកនៅត្រឹម ៥១ ឆ្នាំ ។ ឪពុករបស់ក្មេងស្រីរងគ្រោះ បានចូលរួមក្នុងសវនាការរយៈពេល ៣ ម៉ោង និងសម្ដែងការមិនពេញចិត្តចំពោះតុលាការដែលមិនដាក់ទោសឧក្រិដ្ឋជនធ្ងន់ធ្ងរបំផុតតាមទោសកំហុស ដោយលោកបញ្ជាក់ថា ប្រសិនបើប្រទេស កូឡុំប៊ី មានយុត្តិធម៌ អ៊ូរីបេ គួរត្រូវបានប្រហារជីវិត ។
បងប្អូនប្រុសរបស់ អ៊ូរីបេ ពីរនាក់ ក៏ត្រូវបានឃាត់ខ្លួនផងដែរ ដោយសង្ស័យថា បានបិទបាំងទោសកំហុសរបស់ អ៊ូរីបេ ក្នុងនោះជនសង្ស័យម្នាក់បានសារភាពថាខ្លួនពិតជាបានប្រព្រឹត្តទោសកំហុស ។ អូរីបេ បានចាប់ជំរិតក្មេងស្រីអាយុ ៧ ឆ្នាំ ឈ្មោះ យូលីនៀ សាមបូនី (Juvencio Samboni) ចេញពីតំបន់ក្រីក្រមួយកន្លែងក្នុងទីក្រុង បូគូតា នាំទៅកាន់ផ្ទះល្បែងមួយកន្លែង រួចហើយចាប់រំលោភ និងច្របាច់កសម្លាប់នៅក្នុងផ្ទះល្វែងនោះ ។
ប្រភពៈ efe
ផ្ដល់សិទ្ធិដោយ៖KQUBE
