រដ្ឋាភិបាលកោះតៃវ៉ាន់ ព្រួយបារម្ភថា កោះនេះអាចត្រូវបានប្រើប្រាស់ធ្វើជាលក្ខខណ្ឌក្នុងជំនួបរវាងមេដឹកនាំប្រទេស ចិន និង សហរដ្ឋអាមេរិក ប៉ុន្តែរដ្ឋាភិបាលកោះតៃវ៉ាន់អះអាងថា នឹងការពារផលប្រយោជន៍របស់កោះនេះ ។
ប្រទេស ចិន នៅមិនបោះបង់បំណងនៃការប្រើប្រាស់កម្លាំងដើម្បីនាំយកកោះតៃវ៉ាន់មកគ្រប់គ្រងឡើយ ដែលទីក្រុង ប៉េកាំង ចាត់ទុកជាខេត្តមួយរបស់ប្រទេស ចិន និងកំពុងដាក់សម្ពាធដល់ប្រធានាធិបតីថ្មីរបស់កោះនេះ លោកស្រី សៃ អ៊ីងវ៉េន ដែលជាអ្នកដឹកនាំគណបក្សមាននិន្នាការឯករាជ្យ ឲ្យទទួលស្គាល់ថា កោះតៃវ៉ាន់គឺជាផ្នែកមួយរបស់ប្រទេស ចិន ។
លោក កាដឺរីន ចាង (Catherine Chang) រដ្ឋមន្ត្រីរបស់កោះតៃវ៉ាន់ទទួលបន្ទុកកិច្ចការចិនដីគោក និយាយថា រដ្ឋាភិបាលកោះតៃវ៉ាន់ អំពាវនាវដល់ សហរដ្ឋអាមេរិក និង ប្រទេស ចិន កុំឲ្យប្រើប្រាស់កោះតៃវ៉ាន់ដើម្បីផលប្រយោជន៍របស់ខ្លួន ក្នុងពេលដែល ចិន និង អាមេរិក កំពុងធ្វើឲ្យទំនាក់ទំនងរបស់ខ្លួនកាន់តែល្អប្រសើរ ។
ការព្រួយបារម្ភរបស់កោះតៃវ៉ាន់ មានឡើងក្រោយពីរដ្ឋមន្ត្រីការបរទេស សហរដ្ឋអាមេរិក លោក រ៉េក ថេឡឺសឹន (Rex Tillerson) និយាយប្រាប់ប្រធានាធិបតីចិន លោក ហ្ស៊ី ជីពីង កាលពីថ្ងៃអាទិត្យក្នុងទីក្រុង ប៉េកាំង ថា លោក ដូណាល់ ត្រាំ រំពឹងថានឹងជួបជាមួយលោក ហ្ស៊ី ក្នុងពេលឆាប់ៗ ។ ប្រភពៈ reuters
ផ្ដល់សិទ្ធិដោយ៖KQUBE
