ខេត្តបាត់ដំបង ៖ រថយន្តក្រុងដឹកអ្នកដំណើរ១គ្រឿង បានរេចង្កូតទៅបុកម៉ូតូនិងឡាន ព្រមទាំងខ្យុស៦ខ្នង និងសង្ស័យថា ក្នុងករណីគ្រោះថ្នាក់ចរាចរណ៍ដ៏រន្ធត់មួយនេះ ប្រហែលរថយន្តក្រុងដឹកអ្នកដំណើរ របស់ក្រុមហ៊ុន រិទ្ធិមុន្នី បានជ្រុលទៅបុកកន្លែងខ្យុស លក់សាច់កណ្តុរ តាមបណ្តោយផ្លូវជាតិលេខ៥ អស់ប្រហែល៥-៦តូបខ្ទេចខ្ទី និងកំពុងសង្ស័យថា មានមនុស្សដែលអង្គុយក្នុងខ្យុស ធ្លាក់ចូលក្នុងទឹកផងដែរ ។
ប្រភពអ្នកបានឃើញហេតុការណ៍នោះថា មានរថយន្តបង្ក១គ្រឿង បានបើកបរពីកើតទៅលិច រ៉េចង្កូតបុករះនៅម្តុំក្បាលស្ពានអូរតាគី ដែលជាកន្លែងអាងកណ្តុរលក់ និងជាកន្លែងស៊ីផឹកផងនោះ បានបន្តបុករថយន្តកាមរី កំពុងចតស្ងៀមមួយគ្រឿង និងថែមទាំងបុកម៉ូតូ៤គ្រឿងទៀត សុទ្ធសឹងតែរបស់ភ្ញៀវ ទៅស៊ីផឹកអង្គុយ ក្នុងខ្យុស ទើបរថយន្តបង្កនោះ អស់កំសួលធ្លាក់ចូលទឹកអូរតែម្តង ។
ហេតុការណ៍នេះបានកើត ឡើងនៅវេលាម៉ោង១៥.២០នាទីរសៀល ថ្ងៃទី២២ មីនា ២០១៧ ស្ថិតតាមបណ្តោយផ្លូជាតិលេខ៥ ក្បែរស្ពានអូរតាគីស្ថិត ក្នុងភូមិអូរតាគី ឃុំអូរតាគី ក្រុង/ខេត្តបាត់ដំបង ។ ប្រភពឱ្យដឹងថា រថយន្តក្រុងបង្កខាងលើ មានពាក់ស្លាកលេខ ភ្នំពេញ 3B-4085 ធ្វើដំណើរពីភ្នំពេញ ទៅខេត្តបន្ទាយមានជ័យ។ រីឯរថយន្តកាមរីដែលចតស្ងៀមមានពាក់ស្លាកលេខភ្នំពេញ 2A-5220 និងម៉ូតូ៤គ្រឿងទៀតមិនទាន់បានស្គាល់ស្លាកលេខតែបានរងការខូចខាតយ៉ាងដំណំ ។
ក្នុងហេតុការណ៍ខាងលើ គេមិនទាន់ដឹងពីមូលហេតុនោះទេ ហើយចំពោះមនុស្ស ដែលរងគ្រោះថ្នាក់ក៏មិនទាន់ដឹងថា មានប៉ុន្មាននាក់នោះដែរ តែត្រូវគេសង្ស័យថា អាចមានមនុស្សធ្លាក់ចូលទឹកអូរតាគី យ៉ាងតិច២នាក់ផងដែរ ។ កម្លាំងប៉ុលិសចរាចរណ៍ផ្លូវគោករបស់ស្នងការខេត្តបានកំពុងចុះពិនិត្យនិងរកវិធី ដើម្បីលើករថយន្តក្រុងដើម្បីសង្គ្រោះ ឡើងមកគោវិញ ៕ ដោយ-ឥទ្ធិពល
ផ្ដល់សិទ្ធិដោយ៖VD7News
