រាជធានីភ្នំពេញ៖ នៅព្រឹកថ្ងៃទី២៣ ខែមីនា ឆ្នាំ២០១៧នេះ តុលាការសម្រេចផ្ដន្ទាទោស អឿត អាង ហៅ ជួប សម្លាប់ ដែលបាញ់សម្លាប់លោកបណ្ឌិត កែម ឡី ឲ្យពន្ធនាគារអស់មួយជីវិត។ ក្រៅពីផ្ដន្ទាទោសជនជាប់ចោទរូបនេះ តុលាការក៏បន្តស៊ើបអង្កេត សហចារី ២នាក់ទៀតផងដែរ ដែលម្នាក់ជាអ្នកផ្តល់កាំភ្លើងឲ្យជួបសម្លាប់ និងម្នាក់ទៀត អ្នកនាំជួប សម្លាប់ទៅជួប លោកបណ្ឌិត កែម ឡី។
ជុំវិញកាត់ទោសទោសនេះ អ្នកសារព័ត៌មានដែលបានចុះយកព័ត៌មាននៅសាលាដំបូងរាជធានីភ្នំពេញ បានរិះគន់ពីចំណាត់ការរបស់សាលាដំបូង ដែលដឹកនាំដោយលោក តាំង ស៊ុនឡាយ ជាប្រធានថា មានការរឹតបន្តឹងយ៉ាងខ្លាំង។ ជាក់ស្ដែង គឺមន្ត្រីនគរបាលមានការយាមកាមយ៉ាងតឹងរឹង ហើយនគរបាលសម្រេចឲ្យអ្នកសារព័ត៌មាន ប្ដូរកាតកាសែត មកជាកាតភ្ញៀវ ដែលកំណត់លេខរៀងស្តាប់សាលក្រមជាដើម។
គួររម្លឹកផងដែរថា អ្នកស្រាវជ្រាវការអភិវឌ្ឍសង្គម មានសម្បុរសណ្ដែកបាយ មាឌធំដំបង លោកបណ្ឌិត កែម ឡី ត្រូវបានជួប សម្លាប់បាញ់សម្លាប់នៅព្រឹកថ្ងៃទី១០ ខែកក្កដា ឆ្នាំ២០១៦ នៅឯស្ដារម៉ាត (Star Mart) ក្នុងស្ថានីយលក់ប្រេងឥន្ធនៈកាល់តិច (Caltex) ដែលពេលនោះលោក កែម ឡី មានអាយុ ៥០ឆ្នាំ ហើយភរិយារបស់លោក គឺអ្នកស្រី ប៊ូ រចនា អាយុពពោះនៅក្នុងផ្ទៃ ៥ខែម្នាក់ទៀត ដែលជាកូនទី៥៕
ផ្ដល់សិទ្ធិដោយ៖KQUBE