ប្រិយមិត្តអ្នកគាំទ្របាល់ទាត់កម្ពុជា ប្រហែលជាទន្ទឹងរង់ចាំការប្រកួតនៅល្ងាចថ្ងៃទី ២២ ខែ មីនា ឆ្នាំ ២០១៧ វេលាម៉ោង៦ និង៣០នាទីនេះ ដែលក្រុមជម្រើសជាតិឥណ្ឌា ត្រូវធ្វើដំណើរមកប្រកួតជាមួយជម្រើសជាតិកម្ពុជា។ អាចនិយាយបានថា ជាការប្រកួតទី២របស់ជម្រើសជាតិកម្ពុជា ក្នុងឆ្នាំ ២០១៧ ក្រោយចាញ់ជម្រើសជាតិជើងខ្លាំងលំដាប់អាស៊ីអារ៉ាប៊ីសាអូឌីត ៧-២ កាលពីខែមករា។
គេហទំព័រ Goal បានជ្រើសរើសកីឡាករកម្ពុជា២រូបដែលអ្នកគាំទ្រចង់ឃើញទម្រង់លេងបំផុត ក្រោយពីពួកគេប្ដូរទៅលេងនៅក្រៅប្រទេស។ អ្នកទាំងពីរគឺ៖ ចាន់ វឌ្ឍនាកា និងធារី ចន្ថាប៊ីន។
ចាន់ វឌ្ឍនាកា ៖ ខ្សែប្រយុទ្ធជម្រើសជាតិកម្ពុជា កំពុងឡើងជើងខ្លាំង ដែលត្រូវបានគេចាត់ទុកថាជាកីឡាករសញ្ជាតិកម្ពុជាល្អបំផុត បន្ទាប់ពីអតីតខ្សែប្រយុទ្ធ ហុក សុចិត្រា បានចូលនិវត្តន៍។ កីឡាករអាចលេងបានគ្រប់តំបន់ក្នុងតួនាទីប្រយុទ្ធបានទៅលេងនៅក្លឹប Fujieda MYFC លីកលំដាប់ទី៣ ជប៉ុននឹងត្រូវបានគេរំពឹងទុកបង្ហាញទម្រង់លេងល្អជាងមុន ក្រោយពេលទៅហ្វឹកហាត់ និងយកបទពិសោធន៍ពីជប៉ុន មកជួយជម្រើសជាតិនិងអភិវឌ្ឍជំនាញរបស់ខ្លួន។
រូបគេអាចលេងក្នុងដំណែង ស្លាបឆ្វេងស្ដាំ ប្រយុទ្ធកណ្ដាល និងបម្រើប្រយុទ្ធ(ជំនាញពីកំណើត) ជំនាញញាក់ អូស និងគ្រប់គ្រង់បាល់របស់គេល្អរួមជាមួយកាយសម្បទា បទបែនលឿន នោះជាអ្វីដែលអ្នកគាំទ្រទន្ទឹងរង់ចាំ។ វឌ្ឍនាកា រកគ្រាប់បាល់បាន១០គ្រាប់ហើយក្នុងការចូលលេង២៨ប្រកួតឲ្យជម្រើសជាតិ។
ធារី ចន្ថាប៊ីន៖ ឈ្មោះស្រដៀងទៅនឹងអតីតវីរបុរសក្លឹបកាំភ្លើងធំ Arsenal កីឡាករ Thierry Henry មានដើមកំណើតនៅប្រទេសបារាំង និងមានឪពុកម្ដាយជាជនជាតិខ្មែរ ដែលសម្រេចចិត្តមកប្រកបអាជីពបាល់ទាត់នៅកម្ពុជាវិញ។ ក្នុងពេលជាមួយចាន់វឌ្ឍនាកាដែរ ធារី គឺជាកីឡាករកម្ពុជាម្នាក់ទៀត ដែលលេងនៅក្រៅទឹកដីកម្ពុជាគឺប្រទេសថៃក្នុងក្លឹប Krabi FC នៃលីកទី២របស់ថៃ។
កីឡាករវ័យ២៥ឆ្នាំ រូបនេះជាយុវជនថ្នាលរបស់ក្លឹប RC Strasbourg ដែលជាកន្លែងកីឡាករល្បីៗលំដាប់ពិភពលោកហ្វឹកហាត់ដែលមានដូចជា Morgan Schneiderlin និង អតីតកីឡាករការពារបារាំង Raymond Domenech ។ ចំណុចដែលគេចង់ឃើញគឺទម្រង់លេងប្លែកជាងពីមុន ដែលបានមកពីការហ្វឹកហាត់និងលេងនៅប្រទេសថៃ។ ចាំមើលថាតើរូបគេទាំងពីរបង្ហាញខ្លួនឲ្យជម្រើសជាតិកម្ពុជាបានកម្រិតណាក្រោយទទួលបានបទពិសោធន៍លេងនៅក្រៅប្រទេស។
ផ្ដល់សិទ្ធិដោយ៖KQUBE
