សិល្បៈ ៖ តារាចម្រៀងលោក ពេជ្រ ថាណា ខិតខំសាងកេរ្តិ៍ឈ្មោះលើវិធីសិល្បៈអស់រយៈពេលប្រមាណជាងបីឆ្នាំមកហើយ ដោយលោកបានតស៊ូក្រសោបយកប្រជាប្រិយភាពតាំងពីតារាអមឆាក រហូតក្លាយជា Superstar ប្រចាំឆាកតន្ត្រី។ការព្យាយាមយ៉ាងមុតមាំនេះ ព្រោះលោកមានមហិច្ឆតាចង់ក្លាយជាម្ចាស់រថយន្ត Lexus 330 ដែលជារថយន្តក្នុងក្ដីស្រមៃ។
ឆ្លើយតបតាមទូរស័ព្ទជាមួយលោកតាន់ ចន្ថា អ្នកយកព័ត៌មានវេបសាយ Kqube.net នៅព្រឹកមិញនេះលោក ពេជ្រ ថាណា បានប្រាប់ថា លោកទើបតែប្ដូររថយន្តពី Highlender មកជិះម៉ាក Lexus 330 បានរយៈពេល១០ថ្ងៃមកទេ គឺលោកទិញក្នុងតម្លៃ៣ម៉ឺន២ពាន់ដុល្លារ។
លោកបន្តថា ការឡើងស៊េរីរថយន្តនេះ លោកមិនមានគំនិតចង់ប្រកួតប្រជែងភាពឡូយឆាយជាមួយតារារូបណាទេ គឺគ្រាន់តែស្រឡាញ់ចង់បានវាតែប៉ុណ្ណោះ។ ពេជ្រ ថាណា បន្តថា ក្ដីប្រាថ្នាជិះរថយន្ត Lexus 330 លោកបានប៉ងជាច្រើនឆ្នាំ ហើយលោកក៏បានតស៊ូប្រឡូកការងារសិល្បៈតាំងពីតំណែងជាតារាអមឆាក និងមានតម្លៃខ្លួនទាប រហូតមកដល់ពេលបច្ចុប្បន្នដែលលោកអាចបង្ហាញវត្តមានក្នុងចំណោមតារាដែលមានការគាំទ្រច្រើន និងមានតម្លៃខ្លួនខ្ពស់គួរសម ហើយក៏បានចេញ Show ញឹកញាប់ ដែលអាចជួយឲ្យលោកមានលទ្ធភាពទិញរថយន្តក្នុងក្ដីស្រមៃបាន។
គួរបញ្ជាក់ដែរថា តារាចម្រៀងលោក ពេជ្រ ថាណា អតីតលោកគឺជាតារាកំពូលតារាចម្រៀងប្រចាំផលិតកម្ម សាស្តា តែលោកទើបមកធ្វើកុងត្រាច្រៀងឲ្យផលិតកម្ម ថោន នៅចុងឆ្នាំ២០១៦។ រយៈពេលជ្រកកោននៅទ្រនំថ្មីនេះលោកនៅតែខិតខំតស៊ូយ៉ាងខ្លាំង ដើម្បីបម្រើអារម្មណ៍អ្នកគាំទ្រ៕
ផ្ដល់សិទ្ធិដោយ៖KQUBE
