ពាក់ព័ន្ធរឿងសង្គ្រាមពាក្យសម្តីរបស់មហាជនរិះគន់លោក ម៉ោញ សារ៉ាត់ ដែលមានព័ត៌មានចុះផ្សាយថា លោកបានបណ្តឹងទារលុយពីម្តាយចិញ្ចឹម Maddox លោកស្រី Jolie ១ពាន់ដុល្លារ ជាថ្នូរនឹងការមិនទាមទារសិទ្ធិគ្រប់គ្រង Maddox នោះ លោក ម៉ោញ សារ៉ាត់ ចេញមុខបដិសេធន៍ជាថ្មីថា លោកមិនបានជាប់គ្មានជាប់សាច់ឈាមជាមួយ Maddox ទេ ហើយលោកក៏បានប្តឹង Angelina Jolie ដែរ។
ការចេញមុខស្រាយបំភ្លឺជាថ្មីបន្ថែមពីការសារបង្ហោះលើគណនីហ្វេសប៊ុកផ្លូវការរបស់អតីតប្រធានអង្គការទស្សនខ្មែរដើម្បីអភិវឌ្ឍន៍ រូបនេះ បានធ្វើឡើងតាមរយៈការផ្ដល់បទសម្ភាសជាមួយវិទ្យុបារាំង RFI កាលយប់ម្សិលមិញ។ លោកបន្តថាការចុះផ្សាយព័ត៌មានទាំងនេះ គឺសុទ្ធតែជាព័ត៌មានចចាមអារ៉ាមនិងប្រឌិតតែប៉ុណ្ណោះ។ លោកបន្ថែមថា វាជារឿងគួរឲ្យអស់សំណើច ដែលបានឮថា លោកចង់ប្តឹងទាមទារប្រាក់ ១ពាន់ដុល្លារទៅតារាហូលីវូដ Angelina Jolie ម្តាយចិញ្ចឹមរបស់ Maddox នោះ ដោយលោក អះអាងថាពាក់ព័ន្ធនឹងការប្តឹងនេះ សូម្បីតែដេកយល់សប្ដិ ក៏លោកមិនដែលបានគិតរឿងដ៏គ្មានប្រយោជន៍នេះដែរ។
លោកលើកឡើងទៀតថា វាពិតជាហួសចិត្ត នៅពេលឮសារព័ត៌មានចុះផ្សាយព័ត៌មាន ដោយគ្មានមូលដ្ឋានបែបនេះណាស់។ សូមបញ្ជាក់ផងដែរថា ព័ត៌មានដែលជាប្រធានក្តៅសម្រាប់មិត្តអ្នកលេងក្នុងបណ្តាញសង្គមហ្វេសប៊ុកនេះ ត្រូវបានបែកធ្លាយកាលថ្ងៃទី១៩ ខែមីនា ឆ្នាំ២០១៧ តាមរយៈសារព័ត៌មានបរទេសមួយ ឈ្មោះ The Sun ដែលចុះផ្សាយជាភាសាអង់គ្លេស ថា លោក ម៉ោយ សារ៉ាត មានសិទ្ធិស្របច្បាប់ក្នុងការគ្រប់គ្រងលើកូនប្រុសចិញ្ចឹមច្បងរបស់លោកស្រី Angelina Jolie ឈ្មោះថា Maddox ។
យោងតាមប្រភពដដែលនេះ បានបញ្ជាក់ថា លោក ម៉ោញ សារ៉ាត់ ក៏បានបង្ហាញនូវសំណុំឯកសារស្មុំកូននៅតុលាការខេត្តបាត់ដំបង កាលពីខែសីហា ឆ្នាំ២០០៣ផងដែរនៅក្នុងបទសម្ភាសជាមួយ The Sun ដែលឯកសារនេះបញ្ជាក់ថា តុលាការបានទទួលស្គាល់លោកជាឪពុកបង្កើតរបស់ Maddox ។ កុមារា Maddox ដែលមានឈ្មោះដើមថា រ័ត្ន វិបុល ហើយបច្ចុប្បន្នមានវ័យ១៥ឆ្នាំ ត្រូវបានលោកស្រី Angelina Jolie ទទួលយកទៅចិញ្ចឹមកាលពីឆ្នាំ២០០១ ក្នុងពេលនោះ គេនៅជាទារកម្នាក់នៅឡើយ៕
ផ្ដល់សិទ្ធិដោយ៖KQUBE
