ខេត្តបាត់ដំបង៖ នៅព្រឹកថ្ងៃទី២៥ ខែមីនា ឆ្នាំ២០១៧នេះ មានព័ត៌មានបញ្ជាក់ឲ្យដឹងថា លោក អ៊ាម វន្នី និងក្រុមគ្រួសារកំពុងមានទុក្ខជាទម្ងន់ ដោយសារព្រះអគ្គីបានលេបត្របាក់ផ្ទះយាយខាងប្រពន្ធលោក ដោយបន្សល់ទុកត្រឹមកម្ទេចធ្យូង និងរបស់របរមួយចំនួនទៀត ពីសំណល់ភ្លើងតែប៉ុណ្ណោះ។
យោងតាមបណ្ដាញសង្គមហ្វេសប៊ុកមានឈ្មោះថា ស៊ឹម នីកា ដែលខេឃ្យូបស្គាល់ច្បាស់ថា ត្រូវជាភរិយា របស់លោក អ៊ាម វន្នី បាន Live វីដេអូមុននេះ និងបានឆ្លើយតបសំនួរតាមរយៈ Comnent ជាមួយក្រុមការងារបានឲ្យដឹងថា ផ្ទះនោះត្រូវបានឆាបឆេះកាលពីវេលាម៉ោងប្រមាណជាង ៧យប់មិញម្ល៉េះ ហើយប្រើរយៈពេលត្រឹមកន្លះម៉ោងគត់ ក៏ត្រូវបានព្រះអគ្គីត្របាក់លេបបាត់ឈឹងតែម្ដង។
ប្រភពដដែលនេះបានបន្តថា ពួកគេបានចេញដំណើរពីភ្នំពេញទៅកាន់ខេត្តបាត់ដំបងតាំងពីម៉ោង៨យប់មិញ និងទៅដល់វេលាម៉ោង ២ជិតភ្លឺ ប៉ុន្តែទៅមិនទាន់ពេលទេ ហើយទើបតែព្រឹកមិញនេះ នាំគ្នារុះរ៉ើររបស់របរមួយចំនួន ដែលនៅសល់ សម្រាប់រក្សាទុក។ ហើយបើតាមការបង្ហាញនៅក្នុងការ Live វីដេអូនោះ បានឃើញថា សូម្បីសៀវភៅ ឯកសារនានារបស់លោក អ៊ាម វន្នី ក៏ត្រូវភ្លើងឆេះស្ទើរអស់ដែរ សូម្បីតែអង្ករនិងឆ្នាំងបាយ។
សូមបញ្ជាក់ថា ហេតុការណ៍កើតឡើង នៅម៉ោងប្រមាណជាង ៧យប់ ថ្ងៃទី២៤ ខែមីនា ឆ្នាំ២០១៧នេះ ស្ថិតនៅស្រុកថ្មគោល ខេត្តបាត់ដំបង។ មូលហេតុដោយសារផ្ទុះសេខ្សែភ្លើង ប៉ុន្តែយ៉ាងណាមិញឧបទ្ទវហេតុភ្លើងឆេះផ្ទះនេះ មិនបណ្ដាលឲ្យមានគ្រោះថ្នាក់ដល់ជីវិតមនុស្សនោះទេ ដោយគ្រាន់តែមានរលាកភ្លើងបន្តិចបន្តួចតែប៉ុណ្ណោះ៕
ផ្ដល់សិទ្ធិដោយ៖KQUBE
