ទំនាយថ្ងៃមហាសង្ក្រាន្ត៖ ថ្ងៃចូលឆ្នាំ ត្រូវនឹងថ្ងៃសុក្រ ទំនាយថា ឆ្នាំនេះ ស្រូវ អង្ករ សណ្ដែក ល្ង ផលដំណាំទាំងឡាយបានផលបរិបូរណ៍ទឹកភ្លៀងព្យុះច្រើន ប៉ុន្តែនឹងចាញ់កូនខ្ចី កូនតូច។ កើតមានរោគឈឺភ្នែក មនុស្សនឹងស្លាប់ ព្រោះជម្ងឺច្រើន។
ទំនាយថ្ងៃវ័នបត៖ ថ្ងៃកណ្ដាលត្រូវនឹងថ្ងៃ សៅរ៍ ទំនាយថា ឆ្នាំនេះស្រូវ អង្ករ សណ្ដែក ល្ង ផលដំណាំ ត្រីសាច់ នឹងមានតម្លៃ សមណៈជិព្រហ្មណ៍ នឹងក្តៅក្រហាយចិត្តច្រើនជាអនេក។
ទំនាយថ្ងៃឡើងស័ក៖ ថ្ងៃចុងក្រោយត្រូវនឹងថ្ងៃ អាទិត្យ ទំនាយថា ឆ្នាំនេះព្រះមហាក្សត្រ នឹងរុងរឿងដោយមានតេជានុភាព និងមានជ័យជំនៈលើពពួកសត្រូវគ្រប់ទិសានុទិស ទោះបីប្រទេសធ្លាក់ក្នុងយុទ្ធសង្គ្រាម នឹងបច្ចាមិតត្រយ៉ាងណាមិញ នឹងមានជ័យជំនៈគ្រប់ពេលវេលា។
គួររម្លឹកថា ការកំណត់ប្រតិទិនសម្រាប់ឆ្នាំរកា នព្វស័ក ព.ស ២៥៦១នេះដែរ ជាឆ្នាំប្រក្រតីមាស ប្រក្រតីវរៈ ប្រក្រតីសុទិន។ ខែចន្ទគតិមានចំនួន ១២ខែ ថ្ងៃក្នុងចន្ទគតិមានចំនួន ៣៦៥ថ្ងៃ ដោយខែជេស្ឋមានចំនួន ២៩ថ្ងៃ ជាខែធម្មតា។ ថ្ងៃក្នុងឆ្នាំសុរិយគតិមានចំនួន៣៦៥ថ្ងៃដូចគ្នា ដោយខែកុម្ភៈ ក្នុងឆ្នាំ២០១៧ មានចំនួន ២៨ថ្ងៃ។
ចំពោះការចូលព្រះវស្សាក្នុងឆ្នាំនេះ នៅថ្ងៃអាទិត្យ ១រោចខែអាសាឍ ត្រូវនឹងថ្ងៃទី៩ ខែកក្កដា គ.ស ២០១៧ ជាវរៈចូឡាធិក បានប្ញក្ស ២០ តិថី ១៥ ជាកាលវស្សានរដូវត្រូវតាមគន្លងប្រពៃណីពីបុរាណ ដែលមានព្រះអាទិត្យ ព្រះចន្ទ ចរជាប្រធានត្រឹមត្រូវតាមចក្ររាសី ឲ្យបានដឹងកំណត់ទ្វាទសមាស ទើបធ្វើការសារពើបានចម្រើននូវសិរីសួស្តីជ័យមង្គលបរិបូរណ៍ហោង។
សូមបញ្ជាក់ថា ទំនាយទាំងនេះ ត្រូវបានដកស្រង់ពីសៀវភៅមហាសង្ក្រាន្តឆ្នាំរកានេះ របស់ឯកឧត្តម អុឹម បុរិន្ទ អគ្គលេខាធិការរង នៃគណៈកម្មាធិការជាតិរៀបចំបុណ្យជាតិ អន្តរជាតិ និងជាគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណី ទំនៀមទម្លាប់ខ្មែរ៕
