សិល្បៈ ៖ បទចម្រៀង "ប្ដីទៅកូរ៉េ" ដែលបកស្រាយដោយកញ្ញា និរត្តន៍ បានក្រសោបយកការគាំទ្រខ្លាំងពីសំណាក់ទស្សនិកជន ជាពិសេសនារីៗដែលមានប្ដីទៅធ្វើការនៅប្រទេសកូរ៉េពេលស្ដាប់បទនេះហើយ ពិតជាសម្រក់ទឹកភ្នែកនឹកប្ដីមិនខាន។ ពេលនេះទើបតែដឹងថា សាច់រឿងក្នុងបទចម្រៀងមួយបទនេះ គឺជារឿងពិតប្អូនស្រីបង្កើតអ្នកនិពន្ធល្បីឈ្មោះនៅផលិតកម្ម ថោន លោក ងួន សុបិន។
លោក ងួន សុបិន បានប្រាប់ថា បទចម្រៀងមួយបទនេះលោកបាននិពន្ធចេញពីរឿងពិតរបស់ប្អូនស្រី ដែលប្ដីចេញទៅធ្វើការនៅប្រទេសកូរ៉េ ទុកឲ្យនាងរស់នៅដោយការនឹកអាល័យពីរនាក់កូន។ លោកបន្តថា ប្ដីប្រពន្ធប្អូនស្រីលោកគឺពួកគេស្រឡាញ់គ្នាណាស់ ពោលគឺកាលជួបជុំនៅក្នុងស្រុក ពួកគេនឹកអាល័យមិនដែលបែកគ្នាបានយូរឡើយ តែដោយសារជីវភាពទើបប្ដីរបស់នាងកាត់ចិត្តរៀនភាសាកូរ៉េ ហើយក៏ប្រលងជាប់បានចេញទៅធ្វើការ។
អ្នកនិពន្ធរូបនេះបន្តថា ពេលដែលប្ដីបែកចេញទៅឆ្ងាយប្អូនស្រីលោកនឹកប្ដី បាយមិនទឹកមិនស្រេក ទោះជាប្ដីឧស្សាហ៍ខលមកក្ដី តែនាងនៅតែមិនអាចកាត់ចិត្តបាន។ ឃើញរូបភាពប្អូនស្រីបែបនេះលោកក៏មានគំនិតសរសេរជាបទចម្រៀងមួយនេះឡើង ដើម្បីឲ្យនាងបានស្ដាប់ ហើយក៏ចង់ឲ្យប្ដីនាងបានដឹងពីទំហំក្ដីស្រឡាញ់របស់ប្រពន្ធមានកម្រិតណា ហើយពេលដែលបទនេះនិពន្ធរួច លោកមិនបានឲ្យប្អូនស្រីដឹងទេ គឺទាល់តែបទនេះផលិតចេញជាបទចម្រៀងទើបលោកយកឲ្យនាងស្ដាប់ ដែលធ្វើឲ្យនាងរំជួលចិត្តយំនឹកប្ដីជាថ្មី៕
