សិល្បៈ ៖ ព័ត៌មានតារាចម្រៀងលោក កែវ វាសនា រកទិញផ្ទះគឺបានធ្លាយចេញតាំងពីលោករៀបការបានរយៈពេលប្រមាណជាងមួយខែមកម្ល៉េះ ប៉ុន្តែនៅពេលដែលតារារូបទិញបាន លោកបានបិទព័ត៌មានជិតមិនឲ្យបែកចេញក្រៅទេ ទើបតែល្ងាចម្សិលមិញលោកបានធ្វើពិធីឡើងគេហដ្ឋានថ្មី ដែលមានតារាសិល្បៈជាច្រើនចូលរួម។
ជុំវិញការធ្វើពិធីឡើងផ្ទះថ្មីនេះ Kqube.net មិនទាន់ទទួលបានធ្វើបទសម្ភាសន៍ពីលោក កែវ វាសនា ទេ ដោយនៅមុននេះបន្តិចទំនាក់ទំនងទាមទូរស័ព្ទរបស់លោកមិនមានអ្នកទទួល។ ប៉ុន្តែបើតាមព័ត៌មានពីអ្នកនិពន្ធនៅ ថោន ដែលបានចូលរួមក្នុងកម្មវិធីនេះបានប្រាប់ព័ត៌មានខ្លះៗថា ផ្ទះលោក កែវ វាសនា មិនមែនជាប្រភេទវិឡាដូចព័ត៌មានល្បីពេលលោករកទិញទេ គឺជាផ្ទះល្វែងប្រណិតមួយជុង នៅក្នុងបុរីប៉េងហួតបឹងស្នោ។
ជាមួយគ្នានេះយើងក៏បានសាកសួរពីតម្លៃផ្ទះពីប្រភពខាងលើនេះដែរ ប៉ុន្តែប្រភពនេះប្រាប់ថា ចំណុចនេះគេដឹងមិនសូវច្បាស់ទេ ដូច្នេះហើយមិនហ៊ាននិយាយទេ ព្រោះខ្លាចខុសតម្លៃជាក់ស្ដែង។ប្រភពដដែលនេះបន្តថា កម្មវិធីឡើងគេហដ្ឋានថ្មីរបស់លោក កែវ វាសនា ខាងលើគឺបានហៅភ្ញៀវប្រមាណជាង២០តុ ភាគច្រើនគឺជាតារា អ្នកភ្លេង អ្នកនិពន្ធ និងក្រុមការងារនៅ ថោន តែម្ដង។
