ខេត្តត្បូងឃ្មុំ ៖ រថយន្តសេរីទំនើបមួយគ្រឿង ត្រូវបានអគ្គីភ័យលេបត្របាក់ យកទាំងស្រុង ខណៈតៃកុងរត់យករួចខ្លួន។ ហេតុការណ៍នេះបានកើតឡើងនៅ វេលាម៉ោង00:30នាទី រំលងអាធ្រាត្រ ឈានចូលព្រឹក ថ្ងៃទី២៣ ខែមេសា ឆ្នាំ២០១៧ នៅលើផ្លូវជាតិលេខ៧ ត្រង់ចំណុចចន្លោះ បង្គោលគីឡូម៉ែត្រលេខ ១៩៥-១៩៦ ស្ថិតនៅភូមិបេង ឃុំដារ ស្រុកមេមត់ ខេត្តត្បូងឃ្មុំ។
ប្រភពបានឲ្យដឹងថា រថយន្តដែលត្រូវភ្លើង ឆេះរងនូវការខូចខាតទាំងស្រុង ម៉ាក កាមរីបាឡែន ពណ៍ទឹកប្រាក់ ពាក់ស្លាកលេខ ភ្នំពេញ 2H.1089 អ្នកបើកបរ មិនស្គាល់ឈ្មោះ និងអាស័យដ្ឋាន ព្រោះក្រោយពេលកើតហេតុ បានរត់ចោលរថយន្តបាត់។
ប្រភពដ៏ដែលបានឲ្យដឹងទៀតថា នៅមុនពេលកើតហេតុគេឃើញ រថយន្តខាងលើបានបើកបរពីទិសខាងលិចទៅកេីតនៅលើផ្លូវជាតិលេខ៧ ពេលមកដល់ចំណុចកើតហេតុរថយន្តក៍បានឆេះ ហើយអ្នកបើកបរបានទុករថយន្តចោល រត់គេចខ្លួនបាត់ដោយសុវត្ថិភាព៕ ដោយ ឆវ័ន្ន
