អ្នកនាំពាក្យក្រសួងការពារជាតិថៃលោកស្រី Pornchanok Amphan បានឲ្យដឹងថា យើងនឹងកែប្រែតូបលក់ម្ហូបអាហារនៅតាមចិញ្ចើមផ្លូវ China Town and Khao San ឲ្យមានការរចនាម៉ូដតូបសាជាថ្មី និងការវេចខ្ចប់តាមបែបស្តង់ដារច្បាស់លាស់។ បើយោងតាមការចុះផ្សាយរបស់ nationmultimedia។
លោកស្រីនិយាយថា "អ្នកលក់ម្ហូបអាហារទាំងអស់នៅតាមផ្លូវនឹងតម្រូវឲ្យទទួលការបណ្ដុះបណ្ដាល ដើម្បីធានាថាពួកគេធ្វើអាជីវកម្មរបស់ខ្លួនសមស្របទៅនឹងច្បាប់សណ្ដាប់ធ្នាប់ និងអនាម័យ ជាពិសេសគឺជៀសវាងការរំលោភសិទ្ធអ្នកថ្មើរជើង" ។
ទន្ទឹមគ្នានេះដែរ ប្រធានទីប្រឹក្សាអភិបាលក្រុងបាងកកលោក Wanlop Suwandee បានបដិសេធលើរបាយការណ៍ដែលថា អាជ្ញាធរនឹងលុបបំបាត់តូបលក់អាហារតាមចិញ្ចើមផ្លូវចេញ ដោយអះអាងថា ប្រសិនបើធ្វើដូចនេះ អាជីវកម្មជាង ១ម៉ឺនតូបនឹងត្រូវរងផលប៉ះពាល់ ៕