នាយករដ្ឋមន្ត្រី ថៃ លោក ប្រាយុទ្ធ ចាន់អ៊ូចា និយាយថា ប្រទេស ថៃ កំពុងដំណើរការឆ្ពោះទៅរកការបោះឆ្នោតក្នុងរយៈពេលយ៉ាងយូរ ១៩ ខែ ទៀត តាមការកំណត់របស់រដ្ឋធម្មនុញ្ញ ប៉ុន្តែកាលបរិច្ឆេទជាក់លាក់នៅមិនទាន់ប្រកាសនៅឡើយ ។
លោក ប្រាយុទ្ធ ថ្លែងទៅកាន់ប្រជាជាតិតាមកញ្ចក់ទូរទស្សន៍ថា រដ្ឋាភិបាលស៊ីវិលថ្មីនឹងត្រូវបានបង្កើតឡើងក្រោយការបោះឆ្នោត ហើយរដ្ឋាភិបាលយោធា នឹងប្រគល់ភារកិច្ចទៅឲ្យរដ្ឋាភិបាលដែលកើតឡើងដោយសារការបោះឆ្នោត រួចហើយរដ្ឋាភិបាលយោធានឹងបញ្ចប់ដំណែង ។
មហាក្សត្រ មហាចូឡាឡុងកន បានឡាយព្រហស្តហត្ថលេខាលើរដ្ឋធម្មនុញ្ញដែលគាំទ្រដោយរដ្ឋាភិបាលយោធា កាលពីថ្ងៃព្រហស្បតិ៍ ដែលជាជំហានសំខាន់មួយឆ្ពោះទៅរកការបោះឆ្នោត តាមការសន្យារបស់រដ្ឋាភិបាលយោធា ថានឹងស្ដារប្រជាធិបតេយ្យឡើងវិញ ក្រោយប្រទេស ថៃ ជួបនឹងរដ្ឋប្រហារលើកទី ១២ ក្នុងរយៈពេលជាង ៨០ ឆ្នាំកន្លងទៅនេះ ។ រដ្ឋធម្មនុញ្ញថ្មី គឺជារដ្ឋធម្មនុញ្ញដែលបង្កើតឡើងលើកទី ២០ របស់ប្រទេស ថៃ ចាប់តាំងពីប្រទេសនេះបញ្ចប់របបគ្រប់គ្រងដោយរាជវង្សក្នុងឆ្នាំ ១៩៣២ ។
