សិល្បៈ ៖ រហូតមកដល់ថ្ងៃនេះរបួសនៅលើរង្វង់ភ្នែក សៀតផ្កា និងផ្នែកក្បាល ស្វែង សុជាតា នៅមិនទាន់បានធូរស្រាលនៅឡើយ ដោយនាងបានប្រាប់នៅមុននេះបន្តិចថា អាការឈឺចាប់ដោយសារប្ដីវ៉ៃទាត់ធាក់នៅមិនទាន់បានធូរទេ គឺភ្នែក សៀតផ្កា និងក្បាលមួយចំហៀងកាន់តែឈឺខ្លាំងឡើង។
តាមការប្រាប់ពីតារាសម្ដែង ស្វែង សុជាតា ទាំងសម្ដីខ្សោយៗ ស្ដែងឲ្យឃើញថា អាការប្ដីវ៉ៃទាត់ទាក់រងរបួសយ៉ាងដំណំ ដែលមានសភាពហើមជាំភ្នែក មុខ និងមួយចំហៀងក្បាល គឺនៅមិនទាន់ប្រសើរទេ ។ នេះជាពាក្យសម្ដី ស្វែង សុជាតា បានប្រាប់លោក តាន់ ចន្ថា អ្នកផលិតព័ត៌មានវេបសាយ Kqube.net ថា "ប្អូនអើយ ! មកដល់ពេលនេះរបួសលើកក្បាល ភ្នែក និង សៀតផ្កា បងមិនទាន់បានធូរស្រាលទេ គឺរឹតតែឈឺចាប់ឡើង ព្រោះបងមិនបានទៅសម្រាកពេទ្យយូរទេ គឺគ្រាន់តែទៅឲ្យពេទ្យពិនិត្យកាលពីរងរបួសភ្លាមៗ តែពេលនេះបងបានមកស្អំពន្លៃនៅផ្ទះវិញ"។
ស្វែង សុជាតា បន្តថា "ប្អូនដឹងទេ មូលហេតុបងសុខចិត្តនៅស្អំពន្លៃនៅផ្ទះ គឺមកពីបងព្រួយបារម្ភពីសុវត្ថិភាព ព្រោះអាប្ដីបងហ្នឹង មុនវាគេចខ្លួន វាបានគំរាមបង និងកូនវាថា មិនឲ្យបងនិងកូនរស់នៅលើផែនដីនេះទេ ដូច្នេះហើយបងមិនហ៊ានធ្វើដំណើរទៅពេទ្យ ឬទៅណាទេ ព្រោះពាក្យបណ្ដឹងដែលបានប្ដឹងសមត្ថកិច្ចសង្កាត់ច្រាំងចំរេះ រហូតមកដល់ពេលនេះមិនទាន់មានដំណឹងអីពីនៅឡើយ"។
តារារូបនេះបន្តថា "នៅថ្ងៃនេះ ភ្នែក សៀតផ្កា និងមួយចំហៀងក្បាលបង គឺឈឺកាន់តែខ្លាំង ព្រោះពេទ្យគេថា ប៉ះពាល់សរសៃធ្ងន់ធ្ងរ ដោយសារវាទាក់នឹងស្បែកជើងរឹង"៕
