រដ្ឋសភារបស់កោះតៃវ៉ាន់បានអនុម័តច្បាប់ថ្មីហាមបរិភោគ លក់ដូរ ឬ រក្សាទុកសាច់ឆ្កែ និងសាច់ឆ្នា ប្រសិនបើរកឃើញថាបានប្រព្រឹត្តល្មើសច្បាប់នេះ នឹងត្រូវពិន័យជាប្រាក់ ៨ ពាន់ដុល្លារ អាមេរិក ។ ចំណែកអ្នកដែលចាប់និងសម្លាប់សត្វពីរប្រភេទនេះនឹងត្រូវជាប់គុករហូតដល់ពីរឆ្នាំ និងពិន័យជាប្រាក់ ៦ ពាន់ ៥ ដុល្លារ អាមេរិក ។
ប្រសិនបើអ្នកដែលធ្លាប់ទទួលពិន័យមិនរាងចាល ហើយប្រព្រឹត្តលើកទីពីរ នឹងជាប់ពន្ធនាគារ ៥ ឆ្នាំ ពិន័យជាប្រាក់ មួយម៉ឺន ៦ ពាន់ ៣០០ ដុល្លារ អាមេរិក ។ រដ្ឋសភាកោះតៃវ៉ាន់ក៏បានបង្កើតច្បាប់ហាមប្រាមមិនឲ្យចងឆ្កែជាប់នឹងយានយន្តហើយបង្ខំឲ្យរត់តាមយានយន្ត បើប្រព្រឹត្តល្មើសនឹងទទួលទោសក្នុងកម្រិតមួយផ្សេង ។
ច្បាប់នេះត្រូវបានអនុម័តកាលពីថ្អៃអង្គារម្សិលមិញ ធ្វើឲ្យកោះតៃវ៉ាន់ជាទឹកដីទីមួយនៅទ្វីបអាស៊ីដែលមានច្បាប់ហាមប្រាមមិនឲ្យបរិភោគសាច់ឆ្កែ ដែលពេញនិយមបំផុតក្នុងប្រទេស វៀតណាម កូរ៉េខាងត្បូង និងប្រទេស ចិន ។ សមាជិកសភា វ៉ាង យូ-មីន សរសើរច្បាប់ថ្មីនោះដោយអះអាងថា ធ្វើឲ្យកោះតៃវ៉ាន់ក្លាយជាសង្គមសង្គ្រោះ និងថែទាំសត្វល្អំផុតទីមួយនៅទ្វីបអាស៊ី ។ ទីក្រុង ហុងកុង និងប្រទេស ចិន ហាមប្រាមមិនឲ្យសម្លាប់ឆ្កែ និងឆ្មាយកសាច់បរិភោគ ប៉ុន្តែមិនបានបង្កើតច្បាប់ដាក់ពិន័យចំពោះអ្នកបរិភោគសាច់ឆ្កែឡើយ ។
ការបង្កើតច្បាប់នេះធ្វើឡើងក្រោយពីរូបភាពវីដេអូមួយ ត្រូវបានគេបង្ហោះនៅលើ YouTube បង្ហាញឲ្យឃើញទាហាន ៣ នាក់ ចងព្យួរឆ្កែ រួចហើយវាយសម្លាប់ ។ យោធាកោះតៃវ៉ាន់ត្រូវបានបង្ខំឲ្យសុំអភ័យទោសចំពោះទង្វើរបស់ទាហានទាំង៣នាក់នោះ ក្រោយមានបាតុកម្មតវ៉ាប្រឆាំងនឹងអំពើហិង្សាទៅលើសត្វចិញ្ចឹម ។
ច្រើនទសវត្សកន្លងទៅនេះ កោះតៃវ៉ាន់ ក៏ជាកន្លែងពេញនិយមសម្រាប់អ្នកបរិភោគសាច់ឆ្កែផងដែរ ប៉ុន្តែច្បាប់ថ្មីនេះធ្វើឲ្យកោះតៃវ៉ានក្លាយជាសង្គមការពារសត្វល្អបំផុតប្រៀបធៀបនឹងសង្គមផ្សេងៗនៅអាស៊ីតាមរយៈច្បាប់ហាមបរិភោគ ជួញដូរ និងរក្សាទុកសាច់ឆ្កែ និងឆ្មា ។
ប្រភពៈ dailymail
