សិល្បៈ ៖ កាលពីវេលាម៉ោង២យប់មិញនេះម្ចាស់បទចម្រៀង "ជីវិតក្មេងកំព្រា" និងជាតន្ត្រីករលោក ឆន ថាណន់ បានជួបគ្រោះថ្នាក់ចរាចរណ៍នៅម្ដុំចាក់អង្រែក្រោម ខណៈដែលលោកវិលត្រឡប់មកពីលេងភ្លេងនៅបុរីពិភពថ្មីចម្ការដូង ដែលបណ្ដាលឲ្យរង់របួសបាក់ភ្លៅ បាក់ឆ្អឹងដងកាំបិត និងខ្ទាំសួត។
បងស្រីជនរង់គ្រោះ ឆន ចាន់ថេត បានប្រាប់ Kqube.net នៅមុននេះបន្តិចថា "គ្រោះថ្នាក់ប្អូនប្រុសនេះគឺមិនបានប៉ះជាមួយអ្នកណាទេ គឺគាត់ជិះម៉ូតូតែម្នាក់ឯង ងងុយដេកពេកក៏ជ្រុលទៅបុកបង្គោលភ្លើងតែម្ដង។ ភ្លាមៗនោះប្អូនប្រុសខ្ញុំក៏បានសង្គ្រោះបន្ទាន់នៅគ្លីនិកជិតនោះដែរ ប៉ុន្តែដោយសាររបួសធ្ងន់ធ្ងរក្រុមគ្រួសារក៏បានបញ្ជូនមកមន្ទីរពេទ្យកាល់ម៉ែត្រម្ដងវិញ ហើយពេលនេះប្អូនប្រុសខ្ញុំក៏បានដឹងខ្លួនហើយ តែមិនទាន់អាចចេញពីពេទ្យបានទេ ព្រោះក្រៅពីបាក់ឆ្អឹងភ្លៅ និងដងកាំបិត ក៏ប៉ះពាល់ខ្ទាំសួតផងដែរ។
បងស្រីតារាចម្រៀងរូបនេះបន្តថា សម្រាប់ការព្យាបាលគឺគ្រួសារខ្ញុំខ្វះខាតខ្លាំង ព្រោះជីវិតអ្នកភ្លេង និងជាអ្នកចម្រៀងមិនសូវល្បីគឺរកបានតែមួយក្រពះទេ។ តាមជូនដំណឹងនេះបើសិនបងប្អូនដែលស្គាល់ និងរាប់អានគាត់ទាំងអស់អាចអញ្ជើញទៅសួរសុខទុក្ខក៏ ដូចជាលើកទឹកចិត្តគាត់បាន ទូរស័ព្ទទំនាក់ទំនង 070 66 77 18 ។
គួរបញ្ជាក់ដែរថា តារាចម្រៀង និងតន្ត្រីករលោក ឆន ថាណន់ ខ្សែជីវិតលោកកម្សត់មិនសុខពី រិន សាវេត ទេ ព្រោះថ្មីៗនេះភរិយាលោកទើបស្លាប់ដោយសារជំងឺមហារីកបានបីខែ ស្រាប់តែលោកមកជួបគ្រោះថ្នាក់ចរាចរណ៍ ខណៈដែលខិតខំដើរច្រៀងរកលុយចិញ្ចឹមកូន៕