សិល្បៈ ៖ រឿងរ៉ាវស្នេហាក្រឡាប់ចាក់ប្ដីប្រពន្ធអ្នកសិល្បៈ ឈិន សុធារី និងលោក សុណ្ណ មករា បានកើតឡើងញយដងមកហើយ ប៉ុន្តែពួកគេ ឈ្លោះហើយត្រូវរ៉ូវគ្នាវិញៗ ជាក់ស្ដែងថ្មីនេះក្រោយពីជម្លោះកើតឡើងដោយសារ ឈិន សុធារី តាមទាន់ប្ដីនាំស្រីក្មេងឡើងផ្ទះសំណាក់នៅភ្នំពេញថ្មីមិនទាន់ស្ងប់ផង តារាមួយគូនេះក៏ទើបកើតមានបញ្ហាធំមួយទៀត រហូតលោក សុវណ្ណ មករា ដើរចេញពីផ្ទះ និងសរសេរសារដ៏ភ្ញាក់ផ្អើល សុំដើរចេញពីជីវិតប្រពន្ធកូន និងថែមទាំងបញ្ជាក់ថា ឈិន សុធារី ជាអតីតភរិយាថែមទៀត។ តែទោះជាកំពូលប្ដីបែបនេះក្ដី ក៏នាងនៅតែរំពឹងលោកប្ដីកែប្រែ និងវិលវិញ។
មជ្ឈដ្ឋានអ្នកសិល្បៈ និងទស្សនិកជនតាមដានរឿងរ៉ាវប្ដីប្រពន្ធមួយគូនេះ តែងបង្ហាញការអាណិតអាសូរដល់ ឈិន សុធារី ដោយយល់ថា នាងមានកម្មត្រូវរងទុក្ខផ្លូវចិត្តផ្ទួនៗ ព្រោះតែកំពូលប្ដីមានស្រីថ្មីឥតល្ហែ ហើយពេលកើតរឿងម្ដងៗនាងមិនត្រឹមតែបង្ហូរទឹកភ្នែកស្ទើរខ្សោះខ្លួនប៉ុណ្ណោះទេ មានពេលខ្លះក៏ទទួលរងរបួសស្នាមជាំពេញខ្លួនផងដែរ។
យ៉ាងណាមិញរឿងរ៉ាវចុងក្រោយនេះដ្បិតតែប្ដីប្រពន្ធពួកគេមិនបានប្រាប់រឿងរ៉ាវក្នុងគ្រួសារធំកម្រិតណាក្ដី ប៉ុន្តែនៅពេលលោក សុវណ្ណ មករា ឈានជើងដើរចេញពីផ្ទះ និងបានចេញសារសុំបែកផ្លូវ និងវាយប្រហារបេះដូង ឈិន សុធារី ដោយពាក្យ "អតីតប្រពន្ធ" នោះ មានមតិជាច្រើនគិតថា ចំណងប្ដីប្រពន្ធអ្នកសិល្បៈពីរនាក់នេះ មិនអាចបន្តទៅមុខទៀតទេ គឺអាចនឹងចប់ត្រឹមនេះ។
ទោះយ៉ាងណាមតិខាងលើគ្រាន់តែជាការសន្និដ្ឋាន សម្រាប់ការឆ្លើយតបពី ឈិន សុធារី ជាមួយលោក តាន់ ចន្ថា អ្នកផលិតព័ត៌មាន Kqube.net នៅមុននេះបន្តិច អ្វីៗមិនដូចការគិតទុករបស់អ្នកគាំទ្រឡើយ គឺនាងបានប្រាប់ថា សម្រាប់រឿងរ៉ាវពេលនេះនាងក៏បង្ហូរទឹកភ្នែកមិនខុសពេលមុនៗដែរ តែនាងមិនអស់ចិត្ត ហើយក៏មិនទាន់ថា ពួកយើងបែកគ្នាដែរ ព្រោះមនុស្សយើងម្នាក់ៗមិនថាខ្លួននាង ឬប្ដីទេ តែងមានកំហុស គ្រាន់តែអ្នកនោះចេះកែខ្លួនឬអត់។
ឈិន សុធារី បន្តថា សម្រាប់សារដែលប្ដីនាងសុំបែក និងបានហៅនាងជាអតីតប្រពន្ធ ធ្វើឲ្យនាងនិយាយមិនចេញទេ ព្រោះពួកយើងមិនដែលបានលែងគ្នាទេ ដូច្នេះហើយនាងមិនអស់ចិត្ត និងរំពឹងថា ថ្ងៃណាមួយគាត់នឹងកែខ្លួន វិលរកប្រពន្ធកូន ហើយនាងក៏មិនប្រកាន់អូសដំណើរអីដែរ គឺជូនតាមបំណងដែលគាត់ចង់សប្បាយ គឺនាងស្ម័គ្រចិត្តទទួលយកគ្រប់យ៉ាងឲ្យតែប្ដីសប្បាយចិត្ត ហើយបើគាត់ចង់ធ្វើអ្វីធ្វើចុះ៕
