សិល្បៈ ៖ បទចម្រៀង Original Song របស់ យូរី និង Bmo “ចាក់ទឹកដូង” ត្រូវបានបណ្ដាទស្សនិកជនភាគច្រើននិយាយថា ល្បីដាច់គេ ព្រោះទាំងពីមុន និងក្នុងពិធីបុណ្យចូលឆ្នាំមានរយៈពេលបីថ្ងៃ នៅទីណាក៏ឮបទនេះដែរ ហើយពិសេសជាងនេះទៅទៀតមានអ្នកគាំទ្រទាំងចាស់ក្មេង Cover ក្បាច់រាំ របស់នាងផុសលើបណ្ដាញហ្វេសប៊ុក និង Youtube យ៉ាងកក្រើក។
បញ្ជាក់ប្រាប់លោក តាន់ ចន្ថា អ្នកផលិតព័ត៌មាន Kqube.net កាលពីថ្ងៃម្សិលមិញនេះ យូរី បាននិយាយថា "ខ្ញុំពិតជាសប្បាយចិត្តខ្លាំងណាស់ ព្រោះនេះជាបទចម្រៀងប្រវត្តិសាស្ត្ររបស់ខ្ញុំ ដោយសារបទពីមុនៗមិនដែលទទួលបានការគាំទ្រដល់ថ្នាក់នេះទេ ហើយបទ "ចាក់ទឹកដូង" នេះខ្ញុំក៏មិននឹកស្មានថា មានការជួយគាំទ្រពីសំណាក់បងប្អូនច្រើនដល់ថ្នាក់នេះដែរ គឺខ្ញុំសប្បាយចិត្តហួស តែទោះជាបទខ្ញុំមានការគាំទ្រច្រើន គឺសូមបងប្អូន កុំយកទៅប្រៀបធៀបជាមួយបទរៀមច្បងផ្សេងទៀតអី ព្រោះខ្ញុំមិនហ៊ានទទួលយកទេ ដោយសារខ្ញុំជាអ្នកជំនាន់ក្រោយ ត្រូវការហាត់រៀនពីរៀនពីរៀមច្បងបន្ថែមទៀត"។
យូរី បន្តថា "ខ្ញុំពិតជាមានកម្លាំងចិត្តណាស់នៅពេលវិស័យចម្រៀងខ្មែរទទួលបានការលើកទឹកចិត្តបែបនេះ ហើយខ្ញុំសន្យាថា នឹងខិតខំរិះរកផលិតនូវបទចម្រៀងថ្មីៗបន្ថែមទៀត ដើម្បីទុកជូនជនរួមជាតិស្ដាប់ និងរាំងលេងលេងកម្សាន្តនៅឱកាសក្រោយៗទៀត"៕