ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតី តេជោ ហ៊ុន សែន មានប្រសាសន៍ថា អង្គរសង្ក្រាន្តមិនមែនជារបស់អ្នកណាម្នាក់ តែគឺជារបស់ប្រជាពលរដ្ឋ កម្ពុជា ហើយសង្ឃឹមថា ឆ្នាំជាបន្តបន្ទាប់ក្រៅពីសង្ក្រាន្តនៅខេត្តសៀមរាប នឹងកើតមានសង្ក្រាន្តនៅច្រើនកន្លែងទៀតនៅទូទាំងព្រះរាជាណាចក្រកម្ពុជា។
សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងដូច្នេះក្នុងខណៈដែលសម្ដេច និងសម្ដេច កិត្តិព្រឹទ្ធបណ្ឌិត អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកព្រឹត្តិការណ៍អង្គរសង្ក្រាន្តលើកទី៥ ឆ្នាំ២០១៧ ដែលមានទីតាំងក្បែរប្រាសាទបាយ័ន នាព្រឹកថ្ងៃទី ១៤ ខែមេសា ឆ្នាំ២០១៧ នៅខេត្តសៀមរាប។
សម្ដេចតេជោថ្លែងថា សម្រាប់អង្គរសង្ក្រាន្តឆ្នាំនេះ ដែលប្រព្រឹត្តទៅលើទឹកដីអង្គរ ដែលជាទឹកដីនៃបេតិកភណ្ឌ ពិភពលោក ខ្ញុំរួមជាមួយយុវជនក៏ដូចជាប្រជាពលរដ្ឋកម្ពុជា សម្ដែងនូវការសោកស្ដាយអាឡោះអាល័យ ចំពោះសម្ដេចវិបុលបញ្ញា សុខ អាន ដែលបានចូលរួមគាំទ្រ ហើយតំណាងឱ្យខ្ញុំពីរឆ្នាំដើម្បីបើកអង្គរសង្ក្រាន្ត ក៏ប៉ុន្តែឆ្នាំនេះមិន មានវត្ត មានរបស់គាត់ទៀតទេ។
នេះជាការបាត់បង់មួយសម្រាប់យើង តែក៏បន្សល់ទុក នូវអ្វីដែលជាកិច្ចការដែលត្រូវធ្វើជាបន្ត សម្រាប់កិច្ចការពារបេតិកភណ្ឌប្រវត្តិសាស្ត្រ។
សម្ដេចថ្លែងថា នៅក្នុងរយៈពេល៣ថ្ងៃយើងមានឱកាស ដើម្បីបង្ហាញជូនសម្រាប់ជនរួមជាតិ ក៏ដូចជាប្រិយ មិត្តបរទេស ទៅលើបញ្ហាវប្បធម៌ខ្មែរទាំងឡាយ និងគ្រប់ទម្រង់នៃសិល្បៈវប្បធម៌ជាតិរបស់យើង ដែលនេះ បង្ហាញឱ្យឃើញថាកម្ពុជា ដែលមានប្រវត្តិវ័យចំណាស់រាប់ពាន់ឆ្នាំ និងបង្ហាញពីទីតាំងប្រវត្តិសាស្ត្រនៃទឹកដី បូរមបុរាណដែលជាវប្បធម៌រូបីនិងអរូបី ហើយក៏ក្លាយទៅជាបេតិកភណ្ឌពិភពលោក។ ខ្ញុំពិតជាមានមោទនភាព យ៉ាងខ្លាំងការដែលបានបន្សល់ទុកនូវសម្បត្តិវប្បធម៌ សិល្បៈពីដូនតា និងការចេះថែទាំពីសំណាក់ថ្នាក់កំពូល រហូតទៅដល់ប្រជាពលរដ្ឋរបស់យើង ហើយក្រសួងវប្បធម៌ និងវិចិត្រសិល្បៈក៏នៅតែបន្តព្យាយាមបញ្ចូល ទាំងបេតិកភណ្ឌអរូបី និងបេតិកភណ្ឌរូបីយជាបន្តបន្ទាប់ទៅក្នុងបញ្ជីបេតិកភណ្ឌពិភពលោក នេះជាមោទនភាព របស់ខ្មែរនេះជាស្នាមញញឹមរបស់ខ្មែរ ដែលខ្មែរទាំងអស់គ្នាត្រូវការពារឱ្យបាន។ ជាមួយនេះខ្ញុំពិតជាមានមោទនភាព ជាមួយនឹងប្រជាជាតិយើងដែលបានជម្នះគ្រប់ឧបសគ្គ ប្រឹងប្រែងងើបឈរឡើងពីគំនរផេះផង់ ពីសង្គ្រាមនិងការបែកបាក់ មកកាន់ដំណាក់កាលនៃសន្តិភាព យើងបាននិងកំពុងក្រេបជញ្ជក់នូវសមិទ្ធផល ដែលចេញមកអំពីសន្តិភាព ដែលយើងបានប្រឹងប្រែងរកមកទាំងលំបាក តាមរយៈនៃនយោបាយឈ្នះ ឈ្នះរបស់យើង។ ឆ្នាំ១៩៩៨ ជាកំណត់ត្រាប្រវត្តិសាស្ត្រ ដែលផ្ដល់ឱ្យកម្ពុជាពីប្រទេសដែលធ្លាប់មានតំបន់ ត្រួតត្រាច្រើនមិនតិចជាងពីរក្នុងពេលតែមួយ ទៅជាប្រទេសដែលមានការឯកភាពក្រោមដំបូលរដ្ឋធម្មនុញ្ញតែមួយ ព្រះមហាក្សត្រតែមួយ រាជរដ្ឋាភិបាលតែមួយ និងកម្លាំងប្រដាប់អាវុធតែមួយ។
សម្ដេចតេជោគូសបញ្ជាក់ថា កម្ពុជាក្នុងឋានៈជារដ្ឋមួយក្នុងសមាជិកអង្គការសហប្រជាជាតិ សម្ដែងនូវការព្រួយបារម្ភដ៏ជ្រាលជ្រៅរបស់ខ្លួន ចំពោះសភាពការណ៍នៅមជ្ឈិមបូព៌ា ជាពិសេសសភាពការណ៍នៅប្រទេស ស៊ីរី និងកូរ៉េខាងជើង យើងអំពាវនាវឱ្យមានការអត់ធ្មត់ ហើយព្យាយាមដោះស្រាយនូវជម្លោះទាំងនោះតាម រយៈនៃការចរចា។
ទង្វើនៃការបាញ់ប្រហារតាមរយៈអាវុធមីស៊ីលក្ដី ឬអាវុធគីមីក្ដី វាជាសោកនាដកម្ម ហើយកម្ពុជាធ្លាប់ជាជនរងគ្រោះនៃអំពើបែបនេះ គឺពិតជាបានយល់ច្បាស់ពីការលំបាករបស់ប្រជាជននៃ ប្រទេសដែលកំពុងតែមានសង្គ្រាមហែកហួរ។ ក៏សង្ឃឹមថាប្រជាជនកម្ពុជា រួមជាមួយខ្ញុំ ព្រះករុណាខ្ញុំ ដើម្បី ការពារសន្តិភាពឱ្យខាងតែបាន។
សម្ដេចតេជោ ហ៊ុន សែន បានរីករាយស្វាគមន៍ចំពោះភ្ញៀវជាតិនឹងអន្តរជាតិ មន្ត្រីអង្គទូតនានា យុវជនទូទាំង ប្រទេស និង បងប្អូនប្រជាពលរដ្ឋទាំងអស់ ដែលបានចូលរួម និង គាំ ទ្រ អង្គរសង្ក្រាន្ត និងអរគុណដល់ កងកម្លាំង អាជ្ញាធរដែនដីដែលបានការពារ សុវត្ថិភាពក្នុង ព្រឹត្តិការណ៍នេះ ជាពិសេស សម្តេចតេជោ ហ៊ុន សែន សូមអរគុណចំពោះយុវជនទូទាំងប្រទេស ស្ថាប័នពាក់ព័ន្ធ សិល្បករ សិល្បការិនី ដែលបានចូលរួម ក្នុងព្រឹត្តិការណ៍នេះ។
គួរបញ្ជាក់ដែរថា នៅឆ្នាំ២០១៧ នេះ សហភាពសហព័ន្ធយុវជនកម្ពុជាបានរៀបចំព្រឹត្តិការណ៍អង្គរសង្ក្រាន្ត ក្រោមប្រធានបទ «ការចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ»។
ព្រឹត្តិការណ៍អង្គរសង្ក្រាន្ត នេះត្រូវបានធ្វើឡើង គឺដើម្បីចូលរួមបំផុសគំនិតរួបរួម កម្លាំងសាមគ្គីភាពជាគ្រួសារខ្មែរតែមួយ ក្នុង មោទនភាពជាតិខ្មែរជាធ្លុងមួយ និងបណ្តុះស្មារតីអភិរក្សអភិវឌ្ឍន៍វប្បធម៌ បាវចនាជាតិ ព្រលឹង និង អត្តសញ្ញាណជាតិខ្មែរ ក្នុងបរិបទនៃសមាហរណកម្មសហគមន៍ប្រជាជាតិអាស៊ីអាគ្នេយ៍ «រួមគិត រួមធ្វើ រួមទទួលខុសត្រូវ» ក្នុងសម័យកាលសកលភាវូបនីយកម្ម ទំនើបជំនាន់ថ្មីនេះ៕
