នៅប៉ុន្មានថ្ងៃនេះមិត្តអ្នកលេងក្នុងបណ្ដាញសង្គមហ្វេសប៊ុក មួយចំនួនធំកំពុងពុលនឹងសាររបស់ជនទុច្ចរិត(Hacker)មួយ ដែលតម្រូវឲ្យពួកគេត្រូវផ្ញើសារនោះបន្តគ្នាឲ្យបានមនុស្ស២៥នាក់ បើពុំនោះទេនឹងត្រូវបិទគណនីរបស់ពួកគេ តែផ្ទុយទៅវិញបែបជាធ្វើឲ្យហ្វេសប៊ុករបស់ពួកគេត្រូវបានHackជាបន្តបន្ទាប់ ក្រោយពីពួកគេបានផ្ញើចេញ។
ដើម្បីការពារកុំឲ្យមានបញ្ហាខាងលើបុរសរូបសង្ហាម្នាក់មានគណនីហ្វេសប៊ុក Duong Dara ដែលត្រូវគេស្គាល់ថា ជាអ្នកកាន់ហ្វេសប៊ុកផ្ទាល់របស់ប្រមុខរាជរដ្ឋាភិបាល បានបញ្ចេញសំណេរមួយដែលបង្ហាញពីគន្លឹះក្នុងការការពារពីពួកHacker ហើយសំណេរមួយនេះក៏កំពុងធ្វើឲ្យកក្រើកនិងShare តៗគ្នាឥតឈប់ឈរផងដែរ។
សំណេរនោះមានអត្ថន័យយ៉ាងដូច្នេះថា៖ "រដូវកាលនេះជារដូវកាលក្រុមចោរប្លន់ (Hacker) ចេញរាតត្បាតស្វែងរកលួចផេក (Page/ Account Profile)។ ពពួកចោរប្លន់បច្ចេកវិទ្យាទាំងនេះ គឺពុំមានបំណងល្អទេចំពោះអ្នកប្រើប្រាស់ Facebook។ ពួកវាស្រាវជ្រាវរក Account ណាដែលល្បីដូចជា មន្រ្តីរដ្ឋាភិបាល ពាណិជ្ជករ កីឡាករ តារាសម្តែង ប្រុសស្អាត ស្រីស្អាត កូនចៅអ្នកមានទ្រព្យ កូនចៅអ្នកមានមុខមាត់ក្នុងសង្គម បុគ្គលជោគជ័យការងារ បុគ្គលិកធនាគារជាដើម…។ល។
ថ្មីៗនេះពួកវាបានកូវ៉ល់តាមរយៈការផ្ញើសារចូលមកកាន់ (In Box) យើងអោយ Share ចេញទៅកាន់មនុស្ស២៥ នាក់ទៀត។ ប្រសិនបើពួកវាដាក់ Link អោយចុចបន្ថែម ទៅកាន់មេរោគ (Virus) ទៀតនោះ គឺ Accounts មួយចំនួនធំប្រហែលជាបាត់ ហើយក៏មានអ្នកយំមិនតិចទេ។ ពួកជនទុច្ចរិតទាំងនោះគឺវាកំពុងនៅកូរបំពុលបរិយាកាសសង្គម គឺនៅក្បែរៗខ្លួនយើងនឹងឯង។
សូមប្រុងប្រយ័ត្ន!ដើម្បីសុវត្ថិភាព សូមបងប្អូនដាក់បន្តឹងសន្តិសុខត្រួតពីរជាន់ សូមដូរ Password ថ្មីភ្លាម និងចាក់សោរ បន្ថែមភ្ជាប់ជាមួយលេខទូរស័ព្ទផ្ទាល់ខ្លួន (លេខណាដែលទុកចិត្តបាន ហើយគ្មានអ្នកណាអាចលួចយកបាន) ដើម្បីភ្ជាប់ជាមួយ Facebook។ ប្រសិនបើមានអ្នកណាលួចចូលទៅក្នុង Account របស់យើង ដោយគ្មានការអនុញ្ញាតគឺភ្លាមៗនោះ Facebook នឹងផ្ញើសារលេខកូដ (Code) មកកាន់លេខ ទូរស័ព្ទយើង ដើម្បីបញ្ចូលទៅទើបអាច Log in ចូលទៅក្នុង Account/Profile បាន។
ថ្ងៃនេះ សូមដូរ Password ភ្លាមគឺ លាយអក្សរតូចធំសញ្ញានិងលេខ (ឧទាហរណ៍ដូចជា YeAy#LAN@568712&%F**) សូមចាក់សោរ២ជាន់អោយបានគ្រប់គ្នាថ្ងៃនេះ! គឺចូលទៅកាន់ *Account Profile, Setting, Security, Log-in Approval, (Two-Factor Authentication is currently enabled) – Enable"៕